Захоп Беларусі марсіянамі

Такім чынам, можна ўжо канстатаваць, што гэткае жыцьцё дастала і чыноўнікаў. Яны сасьпелі для новых зьменаў. Пытаньне толькі — на чый бок чыноўнікі стануць. Можа так здарыцца, што сёньняшні прэзыдэнт здолее другі раз перацягнуць іх у лягер сваіх прыхільнікаў. Зымітуе зьмену курсу, паабяцае эканамічныя рэформы, сфармуе новую каманду, дазволіць чыноўнікам беспакарана нажывацца за кошт пасады. Праўда, цяпер гэта будзе зрабіць складаней. Бо, па-першае, чыноўнікі ўсё прыхільней ставяцца да Захаду і цяперашняя антызаходняя гістэрыя ім не падабаецца. Па-другое, прэзыдэнт працягвае сьпісваць усе беды на чыноўнікаў. Пачаліся арышты, канфіскацыі маёмасьці, суды. Чыноўнікі стаміліся існаваць у сытуацыі беззаконьня, калі вінаватым цябе могуць зрабіць у любую хвіліну. Праўда, ня ўсе чыноўнікі гатовыя да змаганьня. Значная частка чакае пераменаў з Усходу: хто спадзяецца на расейскую мілітарысцкую ўладу, хто на расейскі капітал, які прыйдзе ў Беларусь і навядзе свае парадкі. Але сорам прачнуўся ўва многіх. Вось якімі словамі заканчвае сваё інтэрвію Віктар Сазон: "Мне ўвесь час сорамна. Сорамна, калі зрэдку гляджу праграму беларускага або мясцовага тэлебачаньня; сорамна, калі па дыяганалі знаёмлюся зь дзяржаўнай прэсай. Прабачце — дэградацыя. Сорамна за сёньняшняе лісьлівае халуйства. Да таго ж гісторыя вучыць, што заўтра гэтыя ж людзі першымі ўтопчуць у гразь таго, хто сёньня на троне"».

* * *

Пры першай сустрэчы пагаварыць з Чаротам пра полацкія лёхі ў Дудара не атрымалася. Доўгі час не было ні нагоды, ні пэўнага настрою. Чарот усё больш рабіўся чыноўнікам. Падоўгу быў у розных камандзіроўках, пераважна ў Маскве. Шмат сілаў і часу забірала рэдагаваньне галоўнай дзяржаўнай беларускай газэты «Савецкая Беларусь». Ды і Дудар сам паціху ўлазіў у чыноўніцкі хамут — па вяртаньні ў Менск, яго прызначылі кіраўніком менскай сэкцыі «Маладняка», затым стаў рэдагаваць аднайменны часопіс. Да таго ж Алесь неўзабаве пачаў навучацца ва ўнівэрсытэце.