Библиотека литературы Древней Руси. Том 13 (XVI век)
- Автор: Коллектив авторов
- Серия: Библиотека литературы Древней Руси #13
- Год: 2005
- Язык: русский
- Жанр: Древнерусская литература
Электронная книга - «Библиотека литературы Древней Руси. Том 13 (XVI век)». Краткое содержание книги:
Той же Иоан всеми знаемъ бе; мнози свидетелствуют добродетелное его житие, яко велик подвижник бысть в манастыри том, пустынное бо и отходное жителство любя, всякым послушаниемь и смирением, и кротостию украшен, много лет поработав в манастыри. Мы же, сиа оставльше, на предлежащее възвратимся.
„Зосима же вшед, держа жезлъ в руце,[261] и нача бити кудесника, глаголя: «Почто прииде, окаянне и страстне, к рабу Божию? Не подобает ти семо приходити, но иди к подобным тебе!» Приступи же к тебе Зосима, имыи в руце съсудець мал, и нача помазывати из него яко кистью по главе твоей и по лицу. Азъ же, в себе пришед, не видех ничтоже”.
Сиа же слышав Анисим от жены своея, абие въ уныние впаде, начат велми скорбети и плакати о своем съгрешении, глаголя: „Горе, мне грешному, яко Бога прогневах и преподобных отець Зосиму и Саватиа в негодование на ся приведох!” И о сем велми скорбя и каяся. Являет же ся ему в сонномъ видении преподобный Зосима, глаголя: „Что скорбиши тако, человече, и зело унываеши! Аз ти даю севет, в немже велику обрящеши ползу: аще хощеши исцелети до конца, молися Богу прилежно и глаголи Псалтырь. Аще не можеши самъ, то ученику вели глаголати Псалтырь, сам же, послушая, твори Исусову молитву.[262] Егда же приидет праздник святых Богоявлений,[263] ты же искупайся въ иердани[264] и получиши целбу". Анисимь же вся повеленная в видении яве сътвори — и абие бысть здравъ всем телом, яко николиже болев.
Въпрашаетъ же и кудесника оного, что ради тако воскрича. Он же, понашая ему, рече: „Почто нас призываеши на срамоту, а имыи у собя такова врача, от негоже азъ зле пострадах!” Той же Анисим поживе многа лета, здравьствуя и благодаря Бога и угодников Его — преподобных Зосиму и Саватиа. И вь старости добре и исповедании преставися».
Се же написах к вашей любви на ползу, слышах бо от неложных устъ достоверных человекъ. Вы же, Господа ради, простите мя, понеже дерзнух растленнымъ смыслом и недоуменным разумом, отнюд недоволен к сицевой повести. Сами раздрешите недоумение мое, о Бозе имея разум по данному вам от Господа таланту, и сиа украсив, и нас просветите и мьзду приимете от Вседержителя Бога.
Некий человек, имянем Иеремей, измлада живый у преподобнаго въ обители, послужив лета доволна в манастыри всякую службу, еще блаженному Зосиме сущу в животе. Потомъ же той Иеремей отиде в Шую-реку и пребываше мирьскым обычаем: поят себе жену и породи чадо. Преподобный же въ своя времяна отиде Господу, егоже от юности възлюби, и преиде в вечную жизнь.
Той же Иеремей, самовидець быв чюдному житию святаго, аще и в миру живый, но обаче велию веру имяше к святому; аще коя скорбь прилучашеся ему, онъ же моляшеся Богови и на помощь вь молитве Зосиму призываше. Имяше же у собя дщер едину; да яко прииде юная в возрастъ подобный на счетание брака, онъ же приатъ себе некоего юношу в дом свой и вдасть за него дщерь свою в жену. Сим тако бывающим: юным онем пребывающим вь благопокорении, съюзе любовнем и о всем отцу и матери угажающим.
Ненавидяй же добра искони дьявол состави им брань меж себя. Оскорбися юноша гневом велиимъ на отроковицу — и связа ей руце слабце же некако, сам же отступи негде мало взыскати орудиа, чим бити ю. Являет же ся ей кознь бесовъская въ образе человечи, показаяй нож, лежащь близ ея, глаголя: «Возми нож сий и заколи себе, понеже муж твой велми разгневася на тя и хощет тя мучити без милости». Она же, наваждениемъ врага, исторже руце от юзе и, похватив нож, нача резати себя по горлу и по грудем. Прииде же муж ея и обрете ю лежащу, всю кроваву, мало дышущу. Мышляше же юноша въ уме, хотя вринути ея в реку и без вести сотворити. В то же время прилучися быти тамо игумену соловецьскому Исайи. Родителя же отроковици, ощутивше сия, скоро притекоша в дом, плачюще горце. И тако призывают игумена Исайю, идеже лежаше мертвая.
Прииде же отець отроковици в память чюдес бывающих Зосимою, начат съ слезами призывати преподобнаго на помощь, глаголя: «Умоли Бога, отче святый, о лишеней сей отроковици, да негли умилосердиться Богъ твоими молитвами и въздвигнеть еа от смертныя язвы! Помяни, блажене, яко послужихъ тебе съ всем усердиемъ и николиже заповеди твоя преступих! Помози ми, старче Божий, бедующу и убогое свое чадо видя зле кончающеся! Услыши, святый Божии, не презри нас, молящихся в час сей, припадающихъ твоей святости!» Сия отцу отроковици съ слезами горкыми и рыданием въпиющу, яко и всех ту сущих на плач подвиже с собою.
261
Зосима же вшед, держа жезлъ в руце... — Жезл — символ пастырской власти.
262
...твори Исусову молитву. — «Господи Иисусе Христе Сыне Божий, помилуй мя грешнаго».
263
...праздник святых Богоявлений... — То же, что праздник Крещения Господня (6 января по старому стилю).
264
Иордань — прорубь для освящения воды в праздник Крещения.