Библиотека литературы Древней Руси. Том 13 (XVI век)

Случи же ся жене его в лют недуг впасти, от беса мучиме. На мнозе же сему бываюшу, Богу попущающу за съгрешениа человека ко исправлению нашему на болшую ползу. Еже и бысть. Сему же Анисиму прииде во ум ити в манастырь на Соловки Всемилостивому Спасу и Пречистей Богородици, и къ гробом преподобных отець Зосимы и Саватиа ити, и помолитися с женою своею. И сътвори тако. И вложивше болную жену в карбас, начаша плыти по морю. Болная же на сон обратися. Възбнувши же от сна, начатъ глаголати мужу своему: „Аз уже была в манастыре”. Онъ же нача претити ей: „Престани, жено, что беснуешися". Она же пакы крепляшеся тако быти. И нача поведати какова церковь, какова ли другая церковь, какова трапеза в манастыре.

Абие же манастыря достигоша. Анисим же по благословению священниковъ и старцов приводит болную свою жену в манастырь, и помолився вь церквах Спаса и Пречистыа Богородица. Молебная съвершивше, внидоша вь гробницу преподобнаго Зосимы. И остави жену едину у гроба святаго молитися, самъ же изыде въ другую гробницу — преподобнаго Саватиа, отстоящу ступеней яко четыредесять, тамо помолитися о болящей. Сему же молящуся, болная велми въскрича гласомъ. Анисим же слышав, тече скоро и обрете ю лежащу на земли безгласну. Подъятъ же ея и отведе в теплую церковь у трапезы — храм Пречистыя Богородица честнаго ея Успениа. Священникъ же, предиреченый Геласие, освятивъ воду и покропи ея освященною водою, и знаменав Животворящим Крестомъ. Она же пременися от недуга и бысть здрава и смыслена, яко николиже болев, и начат глаголати: „Яко внидохом вь гробницу, и мужу отступльшу от мене, мне же молящеися у гроба, ста предо мною ефиопъ чернъ страшен образом, держа в руце древо велико, и удари мя древом по главе. Аз же от страха взора того и от удара възопих, елико могыи, и падох на земли. Не веде себе, колико лежах. Таже вижду исшедша из гроба старца седа брадою. И нача мя отирати мантиею своею по лицу и по главе и рече ми: «Жено, буди здрава от недуга твоего». Яви же ми ся и Саватей преподобный и глагола ми: «И почто мене не призываеши на помощь, не веси ли, яко оба едино есмы?». Зосима же глагола ему: «Не деи ея, отче, понеже во мнозе скорби не успе»”.

Жена же, получивши исцеление у гробов преподобьных, отиде в дом с мужем своим, радующеся и славя Бога и Пречистую Богородицю и их угодников Зосиму и Саватиа. И оттоле болма начаша держати веру къ святым и обители их.

По некых же временех случися тому Онисиму самому страдати от зелнаго недуга, еже фрянчюги наричются.[258] Он же, забыв благодеаниа святых к себе, прелстився малоумием и призвав некоего кудесника к себе в дом, хотя от него врачеватися.[259] И позва его ясти к себе. Седоста же на обеде — и кудеснику с ними за столом. Абие кудесник начат кричати, въскочив, нелепыми гласы и очи развращати и побеже из дому. Мариа же, Анисимова жена, над неюже преже реченое чюдо бысть, пакы смятеся умом и въскочи от стола, начатъ ужасатися и плакати. Анисиму же в недоумении сущу.

Абие же пакы по мале Мариа собрав си умъ. Муж же нача въпрашати ея: „Что ти бысть? Почто тако ужасеся?” Она же рече: „Яко седящим намъ за столом, абие внидоша въ нашу храмину преподобнии Изосима и Саватей, с ними же познах и третьяго старца, Иоан имя ему".[260]