Библиотека литературы Древней Руси. Том 13 (XVI век)

Есть в Помории наволок, Унежма[270] завомо место то. Некий же человекъ, Никон имянем, тамо живый. Сему же прилучися болезнь тяжка зело: бесъ лют нападе на нь. И удолжися болезнь его яко до полутора года. И живота отчаяся, непрестанно мучим от беса на всяк день. Нападению же бесовскому сице вина бысть на Никона.

Два волхва живяху в той веси, имеюшу прю между собою и тяжущася на суде. Никону же прилучися сведетельство между има: и единому угоди, а другаго оскорби. Оскорбленный же похвалися на нь. И так, бесовскым ухищрениемъ и прелестию своею, злокозненым действом нача кудесбити — и насылает беса на Никона, Богу попущающу съгрешений ради. Начатъ же бес мучити его без милости. Никон же разуме, откуду сиа скорбь наиде ему, яко похвалися на нь окаанный той волховъ. Посылаетъ же сына своего къ другому волхву, емуже приазнь сътвори, да бы ему помоглъ и беса прогнал от него. Он же расмотрив въ своем вълхвовании, отвеща сице: «Не мощно ми прогнати беса от тебе, понеже самому сатоне предан еси, но и кости твоя отдав бесам на разделение. Нечто ти мало помогу за твое добро — на един месяць, прочее же промысли о себе. Аз ти даю съвет: аще хощеши съвершене избыти от беса того, то поеди на Соловкы к тамошнему старцу. Инако бо не можеши избыти, понеже сатане предан еси в даръ».

Никонъ же бяше зело мучим от врага, съвещавает своим, повеле вести собя на Соловки къ Всемилостивому Спасу и Пречистые Богородици, и ко гробом преподобных Зосимы и Саватиа. Абие бес нача мучити его без отпуска на многи дни, разуме бо окааный скорое свое побеждение от святаго. И толма умучи болнаго, яко замертва лежаща. Сердоболи же его в недоумении быша: вести ли в манастырь или не везти, понеже видеща его конечное дышуща, и ничтоже надеятися, разве смерть. Еще же ему дышащу, они же по перьвому съвету и по его вере, тех веру восприимше, иже при Христе разслабленаго принесше на одре къ Христу[271] на исцеление, и не обретше куде внести народа ради, они же верхъ храмины прокопавше, свесиша съ одром пред Исуса, Христосъ же по принесших вере исцели разслабленаго. Сице и сих вера действова. Положиша болнаго в карбас еле жива, Богъ же подасть им угодно плаваниа, скоро достизають манастырь. И вземше болнаго на одръ, в гробницу преподобнаго внесоша.

Лежащу же ему у гроба святаго от третьяго чеса нощи даже до шестаго. Старець же некий, имея к нему приязнь, прииде въ гробницу посетити болнаго. Дети же его седяху над нимъ. Старець же глагола им: «Отидите от него и шедше почиите, не подобает вам ту седети». Самъ же един оста у него и начат речи истязати от болнаго. Он же точию очи възведе, гледая семо и овамо. Показует ему старець гроб преподобнаго. Он же едва мичаша, речь же его не знаашеся. И отиде старец в келию, его же остави единого. Помедлив же мало, пакы приходит къ гробници. И пришед кь дверем, молитву сътворяет, болный же, внутрь седяй, отвеща сладце светлым гласомъ: «Аминь». Старець же скоро вниде вь гробницу, обрете Никона здрава и сьмыслена, в ногах у гроба святаго приседяща.