Библиотека литературы Древней Руси. Том 13 (XVI век)

Ненавидяй же добра искони злый съветник диаволъ начат разжигати и влещи его на первый обычай. Приим же си въ умъ бежати из манастыря. Таже злый съвет и на дела производит окааннаго. Украдает себе карбас манастырской и елико же где что обрете: от книг или платья, или иныа какыа вещи, якоже есть обычай крадущим, събирает же вся сиа в карбас. Нощи же наставши, Василию бдящу, подобна времени ожидающу, и съ всем тем, елико имяше, бегу ся ят, един пловый по морю, аможе ветръ несый его.

Приносим же бывает въ Анзеры — остров тако нарицаем, Соловецкый же бе; той остров от манастыря верстъ пять на десять. Абие сонъ нестерпим наиде на нь, елико немощно гренутися или очию възвести. Он же приставает к брегу, хотя мало опочити. Поставляет карбас с рухледию при брезе, сам же падает на земли, сном тяжко одержим. Спящу же ему, являются два старца къ нему пришедша. Единъ же от них, со гневом възрев на нь, рече: «Како, окаанне, крадеши мя! Азъ съзидаю, ты же разаряеши!» Тать же и въ сне, яко на яве, нача каятися к нему: «Прости, господине отче, прости!» Святый же отвеща: «Прощение получиши, а седети три дни на месте том, плача!» Еже и бысть. Възбнув же от сна, не бе гласа, ни послушаниа: ни старцевь, ни карбаса. Он же начат плакати о своем съгрешении 3 дни. В четвертый же день гостем едущим с Двины близ острова того, он же начат вопити и звати их к себе. И послаша по него с малым карбасомъ, и привезоша й к себе в ладию.[265] Он же сказа им вся яже о себе. И тако привезоша его в манастырь.

Мы же на предняа возвратимся: каково промышление имеет святый о своей обители. Ловцем манастырьским седящим на тони[266] за морем во Умбе-реце,[267] отстоит от Соловецского острова яко пятьсот верстъ или множая. Бе же тамо старець Фотей именем. Сему же спящу в келии, от труда ловитвенаго почивающу. Являются ему два старца; зрит же, яко и молитву сътвориста. Фотей же позна единого, бе бо ученикъ святаго, рече: «Какъ бы тя знаю, господине, ты еси Зосима, отець нашь». Святый же отвеща: «Азъ есмь. Привезох же вам и карбас, аще требуете. А яже в карбасе, сия вся съхраните, да ничтоже от тех погибнет!» Сим же бе нужна потреба, карбаса на ловлю не имеющим.

Фотей же, от сна възбнув, истинно видение обрете. Призываетъ же и съделникъ-подруг своих и възвещает виденнаа во сне. Они же яве шедше на море, обретоша карбасъ съ всею рухледию, ничтоже от положеных погибе! А таково растояние долготы моря: колико ловцов, колико ездящих по брегу и по морю, а никим же бысть врежено положеное в карбасе! Видите ли, братия, каково попечение имат о месте сем блаженый отець наш Зосима! Сия же видяще и слышаще, подобает намъ съ страхом о своем спасени пещися, и несумненною верою Богови молитися прилежно, и угодников его преподобных Зосиму и Саватиа на помощь призывающе — да молитвами их избудем вечныя мукы и будущих благъ сподобимся!