Мясцовы час

Даў я нядаўна інфармашку на рэспубліканскае радыё пра выхад «Твара Тутанхамона» і канфэрэнцыю ТВЛ. Праграма павінна прагучаць у пятніцу зранку. Так што, калі ты атрымаеш гэты ліст, яна ўжо прагучыць. Ну й сёньня я выступіў у праграме «Гарадніца» на абласным ТУ, запрэзэнтаваў «Т.Т.» ды, вядома, надаў розгалас нашай канфэрэнцыі. Пры словах «Фонд Сораса» ў прысутных у студыі паадвісалі сківіцы, а тэлегледачы (як я даведаўся пазьней) пераканаліся ў сур’ёзнасьці ТВЛ, як саліднай арганізацыі, якая выйшла на міжнародны ўзровень.

Дасылаю Табе «Сьвіцязь» №2. Якім бы ён ня быў, але наша прысутнасьць у ім не зашкодзіць. З трэцяга нумару пераходзім цалкам на «тарашкевіцу» (мадэрнізаваную). У наступным нумары зьявіцца маё інтэрвію, якое Табе чамусьці не спадабалася. Затое Ю.Пацюпа з прафэсарам С.Габрусевічам ледзь з рукамі не адарвалі гэты матэрыял. А там жа пра ТВЛ! Варта згадаць і пра апавяданьне Аляксандра Скарабагатава — пісьменьніка-гарадзенца, які здабыў розгалас на Захадзе. Зараз ён жыве ў Галяндыі. Празь ягоную маці мы ўсталёўваем зь ім шчыльныя кантакты. Зараз Санёк піша нейкі сцэнар для Галівуда. Гэта ўсяляе аптымізм...

Прафэсар з Гданьску Малгажата Чэрміньска абяцала «прабіваць» нашыя матэрыялы ў гданьскіх часопісах. Малайчына, кабета!

Заўсёды ТВОЙ

5-6.10.1994

Гародня

Р.S. А «Твар Тутанхмона», бадай, дашлі яшчэ. Загадзя ўдзячны.

Першая тэвээлаўскай канфэрэнцыя ладзілася ў Наваполацкай цэнтральнай гарадзкой бібліятэцы. На яе прыехалі прадстаўнічыя літаратурныя дэлегацыі з Украіны і Расеі. Расейскую дэлегацыю ўзначальваў Дзьмітрый Кузьмін, вядомы арганізатар, ініцыятар і выдавец расейскага літаратурнага андэграўнду. У склад расейскай дэлегацыі ўваходзілі такія зоркі альтэрнатыўнай расейскай літаратуры, як Герман Лукомнікаў (Баніфацый), Мікалай Байтаў, Аляксандр Голубеў, а таксама мастацтвазнаўца Леанід Лучкін. З Украіны мы запрасілі галоўнага рэдактара харкаўскага часопіса «Украінськйй Засів» Ігара Бондара-Цярэшчанку, які прывёз з сабой зусім яшчэ тады маладзенькага паэта Сяргея Жадана, які быў ці не наймалодшым з усіх удзельнікаў канфэрэнцыі. Адразу з Прагі, з міжнароднай канфэрэнцыі ПЭН-цэнтру, у Полацак прыехаў славуты ўкраінскі паэт Уладзімір Цыбулька. Натуральна, самая прадстаўнічая дэлегацыя была беларуская, якая складалася зь пісьменьнікаў, філёзафаў, літаратуразнаўцаў, мастакоў, бардаў і музыкаў — Уладзімер Арлоў, Валянцін Акудовіч, Алесь Анціпенка, Пятро Васючэнка, Юрась Барысевіч, Лявон Вольскі, Міхал Анемпадыстаў, Сяржук Цімохаў, Алесь Пушкін, Кася Камоцкая, Дзьмітрый Строцаў і многія іншыя. Ну і таксама амаль у поўным складзе сябры ТВЛ. Юры Гумянюк угаварыў мяне запрасіць свайго былога паплечніка па студэнцкім паэтычным гурце «Дыяген», скандальнага гарадзенскага паэта Андрэя Пяткевіча. Нягледзячы на свае нядаўнія да яго крыўды. Пяткевіч прыехаў, паводзіў сябе вельмі ціха, глядзеў на ўсё шырока адкрытымі вачыма.