Статут Великого княжества Литовского 1588 года
- Автор: Сапега Леў
- Язык: белорусский
- Жанр: Европейская старинная литература
Электронная книга - «Статут Великого княжества Литовского 1588 года». Краткое содержание книги:
Артыкул 17
О забитью або раненью здрадливым потаемным обычаем.
Хто бы кого неведоме без звады, але молчком, здрадливе а потаемне в ночи або и в день забил, то ест або в дорозе крыянкою с куста, з заплотья, або в месте, в селе, на улицы заседшы, або в дому, через дверы, через окно албо в коморце таемной потребной якою стрелбою пострелил, або зручною бронью якою забил, будь теж спячого яко колвек о смерть приправил, албо теж в беседе, або в ыншом яком згромаженья людей, але молчком потаемне пуйналом и якою кольвек бронью забил, а на том бы учынку был пойман, або то на него слушным доводом было переведено, таковый, если то шляхтич шляхтичу учынить, срокгою смертью, четвертованьем або на паль битьем каран и почстивости отсужон будеть. А головщизна з именья або маетности его рухомое совито плачона быти маеть. А естли не забеть, толко ранить шляхтича, тот предсе горлом каран будеть, и навезка з именья плачона быти маеть. А естли то шляхтичу чоловек простый учинит, тогды за забитье, по сказанью на горло, розными срокгими муками з сего света зглажон будеть, а за рану стят быти маеть. Пакли ж бы то хто над ким з направы чыее учынил, и, то бы поведаючы, смертью такую повесть свою запечатовал, тогды при иншых слушных явных знакох, которые бы се в той речы оказати могли за доводом слушным правным, и сам тот, хто бы направил, так, яко и тот, хто то учинил, каран быти маеть. А не будет ли знаков, доводов явных слушных, толко поволанье, смертью запечатаное, от того обвиненый тым поволаньем отприсягнутисе винен будеть.
Артыкул 18
О запалячох мест и домов.
Естли бы хто так злого а шкодливого учинку важился, а смел умысльне запалити замок, место або двор наш, господарский, альбо теж замок, дом князкий, панский, шляхетский, а в том бы тому запалячу меновите от ушкожоного вина была дана або бы его заразом на том учынку поймано, тогды за доводом слушным правным, так, яко о иншых речах кривавых, звлаща яко о доводех наезду кгвалтовного на дом шляхетский, а меновите около присеги з шестма шляхтичы ест вышей описано, зостанеть ли в том винен, маеть быти сам огнем спален. А маетность, ушкожоная огнем, з маетности теж его, естли которая будеть, плачона быти маеть.
Артыкул 19
Хто бы забил кгвалтовника в дому своем и помочников его.
Теж уставуем: хто бы на чый дом або на господу кгвалтом наехал або нашол, а тот господарь домовый, так теж и гость, который в том дому або в господе стоить, оного кгвалтовника самого або помочников его, боронячы дому або господы своее, забил, тогды скоро по оном кгвалте маеть суседов околичных обослати, обуолати и оповедати. И того ж часу до вряду нашого судового того повету, в котором се то станеть, ехати або послати и, вземшы возного и сторону людей добрых, шляхту або иншых суседов вери годных, оный кгвалт и забитого кгвалтовника в дому своем оказати. А потом, кгды будет о тое забитье обвинен, тогды за оказаньем слушных знаков кгвалту мает з жоною и з детьми, лет дорослыми, и с трема шляхтичами, собе ровными, а не будеть ли мети жоны або детей, ино с тыми трема шляхтичы, а не будет ли трех шляхтичов до отприсеженья з собою мети, ино з слугами и с челедью домовою самопять предсе маеть присегою се отвести на том, иж тот забитый кгвалтом наехал або нашол, а сталосе за початком того забитого. А естли бы толко ранил, а не забил, тогды сам один пан домовый або гость, в господе стоячый, маеть присегнути, иж яко кгвалтовника в дому своем ранил. Таковый головщыны, ран и шкод никоторых платити не будеть повинен.
Артыкул 20
Хто бы наехал або нашол на чужое именье або на село кгвалтом, а тот, боронечи кгрунту своего, забил.
Теж уставуем: которому бы шляхтичу шляхтичь або хто кольвек иный умысльне на чие именье, на село, на люди и на кгрунты кгвалтом нашол або наехал и кгвалт або значную якую шкоду чинил, яко забраньем людей, быдла, статку, жатьем або браньем збожья, сена, рубаньем лесов, гаев або каженьем границ, меж, копцов, ловеньем озер, а тот шляхтич, боронечи именья своего, оного кгвалтовника своего забил або ранил, тогды маеть тым же способом, яко вышей о кгвалтовнику домовом ест описано, присегою своею отвестися. А кгды присегою се отведеть, иж его яко кгвалтовника на таковом учинку забил або ранил, за такового головщизны, навезки ани шкод также платити не будеть повинен. А о свою кривду и шкоду, которая се будеть в он час стала, предсе тому, на чие именье было наехано, волно будеть на оном кгвалтовнику або на именью и маетности его всякой правом доходити.
Артыкул 21
Хто бы на кого на дорозе засел, а в том сам забит был.
Уставуем: кгды бы шляхтич другому шляхтичу доброволную дорогу засел, хотечи его умысльне забити або ранити, а тот, боронечи горла своего, того, хто засел, забил, тогды скоро по оном забитью маеть ехати и оповедати то вряду судовому наблизшому и, до вряду едучи, суседом околичным и кого в дорозе поткает, оповедати. А потом, кгды се то до права приточит, а жона, дети або близкие забитого менили бы то, же тот забойца сам тому забитому был засел або пак на дорозе, угонивши, або поткавши, невинне, без причины и початку его забил, а тая бы жона, дети або близкие при том забитью сами были и в такой бы речи з обу сторон за собою доводы мели и у права ставили, тогды вряд для лепшое певности и дознанья справедливости светое маеть на шкрутыним , то ест на выведанье тое речи там до того местца и до тое околицы, где се то станеть, водлуг порядку о шкрутынии, нижей постановленого, сам выехати або выслати. И за ким болш слушнейших и значнейших доводов так на выведанью, яко и на праве у суду ку сведецству и ку присязе будеть, тому вряд на довод альбо отвод присягою самотретему, будь з людми сторонними або в недостатку обеих людей — жоне або мужу з детми, а где бы детей дорослых не было, ино з слугами, с челядью припустити маеть. А хотя бы жалобная сторона, приятели забитого сами при том забийстве не были, але бы вжды слуга або колько их при нем было, тогды таковые слуги мають быти до секвесту врядового взяты, и у них о том пилное выведанье маеть быти чинено, порозну их о том пытаючи. Которые слуги, если бы то ж, што и повинные забитого, твердили и присегою своею того подперети хотели, тогды и в такой речи маеть се вряд так же заховати, яко вышей описано. А естли бы слуги забитого, в секветре будучи, з жалобою приятел его не згожалисе, ино тот обвиненый близший будеть, яко вышей описано, самотреть отприсегнутися и так от горла и головщизны и шкод волен будеть. Одно ж, где бы се тое забийство стало без бытности инших людей, так приятел, яко и слуг, толко межы двух особ, а приятели забитого брали бы се ку доводу, тогды, такеж за слушным выведаньем через вряд и за высветченьем людей веры годных, вжо тот обжалованый близший будеть при оповеданью своем, хотя и сам один отприсегнутисе. А по отприсяженью от горла, головщизны, везенья и от шкод волен будеть. Пакли ж бы чоловек стану простого, не шляхтичь, шляхтичу дорогу засел, хотечы его забить або бити, а шляхтич бы, боронечы здоровя своего, того самого, хто ему засел, забил, тогды при оповеданью таковом, яко вышей описано, шляхтич и один сам можеть отприсегнутисе, же то не умыслне, але за початком оного забитого в обороне учынил. А не всхочет ли се отприсегнутисе, тот головщизну без доводу, а шкоды за доводом заплатити маеть.