Статут Великого княжества Литовского 1588 года
- Автор: Сапега Леў
- Язык: белорусский
- Жанр: Европейская старинная литература
Электронная книга - «Статут Великого княжества Литовского 1588 года». Краткое содержание книги:
Артыкул 5
Которые печатниками и светками пры чиненью тестаменту быти не могуть.
Теж уставуем, иж при справованью тестаменту печатниками и светками быти не могуть тые особы, нижей назначоные, то ест напервей которые своих тэстаментов чинити не годни; второе, невесты; третее, екзекуторове або опекунове того тестаменту; четвертое, теж и тые быти не могут, которым в том тестаменте што будеть описано.
Артыкул 6
С которых причын тестамент за моцный у права приймован быти не маеть.
Коли бы в котором тестаменте на дате або на местцу яком значном поправовано и скробано ку шкоде которой стороне, таковый артыкул в том тестаменте за моцный у права не маеть быти приймован. А вшак же где бы на местцу мало потребном, не в дате ани стороне ку шкоде был скробаный або поправованый, што бы се стало з омылки того, хто писал, тым того артыкулу в том тестаменте касовать не можеть. А хто бы хотел бурыти тестамент, и если бы в одном албо в колку артыкулех, над право описаных, был нарушон, а вси иные водлуг права справлены, тогды одным албо колькома артыкулов всего тестаменту касовати не может. Так же и о записех всяких на каждую реч розумено и сужоно быти мает.
Артыкул 7
Причыны, для которых отец сынов або дочок выречысе можеть.
Уставуем, иж отец и матка выречисе сына и девки может с прычын тых, нижей описаных. Першая: если бы сын або девка, не помнечы на пана бога и на родичы свои, торгнулся рукою, ударыл або пхнул з гневу, такового не только выречысе может, але горлом от ураду за жалобою и доводом родичов каран быти мает. Другая: коли бы сын або девка значную кривду родичом чинили в забиранью маетности без воли и ведомости их. Третяя: естли бы сын або девка зе злости своее а не для пожытку речы посполитое, фолдровали на родичов своих на горло кому кгволи. Четвертая: если бы ся трафило где у права ойца або матки ручыть не хотели ку постановенью, а звлаща, где бы того врад допустил. Пятая: если бы девка, нестатечне чыстость свою на вшетеченьство оборочаючы, мешкала. Шостая: если бы родичов опустили в зошлых и старых летех их, а не давали жывности и иншых потреб родичом. Семая: кгды бы родичов з рук неприятельских окупить або вызволить не хотели, а маетности отцовское або матчыное ужывали. Што усе если бы ся явне и правне перед урадом показало, с таких причын родичы могут детей своих выречися.
Артыкул 8
Нихто не может челедину домовому ани полоненику своему ничого записати, волным его не вчынившы.
Уставуем, иж кождый якого колвек стану челедину домовому ани полоненику своему, не вчынившы его наперед волным, ничого тестаментом записати не может, ажбы его первей волным учынил. А вед же тестаментом и каждым листом явным может такового челядника своего волным вчынити, а учынившы, тым же тестаментом может ему што водле воли своее записать.
Артыкул 9
Кождый слуга путный и мещанин мест неупрывильеваных и теж чоловек простый як тестамент чынити маеть.
Уставуем, иж кождый с таковых людей волен тестамент о речы свое рухомые чынити и отписати третюю часть всее маетности своее кому похочеть. А две части тых же рухомых речей маеть зоставити в дому своем детем для службы тое земли, на которой седит. А не будет ли мети детей, ино предсе тые две части маетности его мает зостати в дому его ку службе оного пана, на чыей земли седел. А если бы дети, будучы волни, а хотели проч пойти, тогды, и тые две части маетности вземшы, мают пойти проч, толко землю пану своему подати з жытом засеяным, и с хоромами, и с тым зо всим, с чым хто будет тую землю пана своего на службе взял.
Роздел девятый. О подкоморых в поветех и о правах земленых; о границах и о межах
Артыкул 1
О уставленовенью подкоморых в поветех и о прысязе их.
Уставуем, иж в кождом повете маеть быти подкоморый присяглый и оселый в повете том, также и в земли Жомоитской. Вед же того вряду подкоморства иначей давати не маем, одно за обраньем на то певных особ чотырех через обывателей кождое земли и повету тым порядком, яко обиранья иншых врядников судовых земских: суди, подсудка и писара — ест в сем статуте описано. А с тых особ обраных и нам от станов поданых кого се нам напрыстойней видети будеть, того мы, господар, зверхности нашое господарское на тот вряд преложим и привильем нашым его потвердим до жывота его або до подвышенья на иньшый який большый вряд або достоеньство. А первей, нижли тым урядом подкоморским справовати будеть, маеть прысягу на тот вряд свой на першых рокох судовых земских перед врядом судовым земским и перед всими иными станы, так на роки прыбылыми, вчынити тыми словы: "Я, найме , прысегаю пану богу всемогущому, в тройцы единому, иж на вряде том земском подкоморском, который з ласки и з рук его королевское милости беру, его королевской милости господару своему милостивому и обывателем того повету верен буду, справуючы тот вряд верьне а справедливе так на суде моем подкоморском, яко теж при чиненью границ и пры сыпанью копцов, и поправеню меж, ничого болшей на том уряде не постерегаючы, одно справедливости светое, и не даючысе ни в чом уводити, ани приязни, ани звазни, ани даром, и погрозок ничиих не дбаючи, и сторонам не радечы, ани боячисе никого, толко самого пана бога а справедливость его светую перед очима маючи. Также справы мое подкоморские на всем верне справуючи, споры обудву сторон з сказаньем, через мене учыненым, пилне до книг своих судовых уписуючи и с книг выдаючы, так ми, боже, поможы".
Артыкул 2
О повинности и владзы вряду подкоморского.
Во всих розницах земляных и граничных за отосланем от суду земского або кгродского мають подкоморые моцю зверхности нашое и владзы уряду своего давати позвы по стороны под именем и печатью своею и с подписю руки своее и за тыми позвы своими от поданья их, так очывистого, яко заочного, рок завитый на выезд на кгрунт складати за шесть недель о всякие розницы земленые и иные входы, пожытки. Которые ж позвы подкоморого мають трвати от взятья их до поданья албо положенья стороне толко через год. А хто, позвы взявши, до году ими не позовет, тот потом иншые позвы отновити и взяти маеть. А за позвы выехавшы подкоморый на кгрунт пенный и огледавшы довод права листов и знаков граничных, и светков, чые листы лепшые, и знаки граничные певнейшые, и светки слушнейшые, тую сторону мает ку доводу прыпустити и, выслухавшы доводу, водле статуту маеть кгрунт пенный и границы сказати, копцы и знаки граничные учинеть. А хто в кгрунте винен зостанеть, тот кгвалт платити повинен, а навезки всякого стану и головщызны людей простых, так же шкоды вси за доводом слушным правным заразом там же на кгрунте, не откладаючы того на иншый час и до иншого суду, сказати и на то все лист свой судовый под печатью своею и с подписом руки своее дати. И колко кгвалту, навезок, головщын, шкод подкоморый скажеть, то через лист свой отвороный винен будеть вряду тому судовому земскому або кгродскому, от которого первей отосланье к нему тое справы было, ознаймити. А вряд тот судовый за отосланьем и ознайменьем подкоморого маеть стороне поводовой отправу на именью стороны противное водлуг артыкулов, в сем статуте вышей о отправе речей сужоных постановеных, учинити. А где бы з обеюх сторон выводу правного на писме або теж и знаков граничных явных слушных не было, толко бы светки ставили, тогды поводовая сторона пры жалобе своей маеть быти ку доводу прыпущона, то ест ку светкам, веры годным, и ку прысязе их и самого жалобника. Вед же где бы поводовая сторона пущала на прысегу стороне позваной самой албо з светками ее, а она бы се за прысегу доброволне узела, тогды за прысегою реч одержыть и кгвалту, боев, шкод волен будеть. А хто бы, взявшисе за прысегу, не учинил бы ее, тогды реч тратить.