Статут Великого княжества Литовского 1588 года

Артыкул 22

Хто на чыей земли посеет збожье, як маеть заповедати возьным, абы не звозил до права.

Уставуем: хто бы на чыей земли збоже якое кольвек без ведомости оного, чый кгрунт, посеял, тогды тот, хто своею землею быти менуеть, маеть взяти лист заповедный от вряду земского або кгродского того повету, в котором тот кгрунт лежыть, и тым листом врядовым через возного и двух чоловеков сторонны якого колвек стану маеть заповедати тое збоже самому тому пану або его вряднику, хто будеть сам або его подданый посеял. А если бы самого пана або врядника возный в дому не застал, або се указати не хотел, тогды покладаючы копею с того листу заповедного на именью тым обычаем, яко о покладанью листов упоминальных ест доложоно. А в том листе заповедном, написавшы тую землю, где збоже засеяно меновите и достаточне, яко где лежыть, маеть быти доложоно под закладом на вряд и сторону дванадцатма рублями грошей, абы тот, хто сеял, того збожья с того кгрунту не звозил, але пожавши его перед возным и людми сторонными, на то от стороны жалобное послаными, и за ведомостью а поличеньем того возного и стороны поставил на той же земли до права и опатрил то добрым зложеньем и огороженьем, яко бы в нем до росправы шкода не сталася. И по той заповеди сторона жалобная мает сторону свою противную надалей за шесть недель позвы подкоморого ку росправе о тую землю позвати. А где бы з яких припалых слушных правных причын в шести неделях по заповеди позвати не мог, тогды еще ему час позыванья заставити маеть и через другую шесть недель. И если бы тот, хто заповедал перед подкоморым албо коморником, довел того правом, што ж оный противник его тое збоже будеть посеял на его властной земли, тогды маеть ему быти яко земля, так и тое збожье и к тому кгвалту дванадцать рублев грошей сказано. А где бы тое збожье заповедное погнило або потравлено, тогды то ему противная сторона водлуг статуту заплатити повинна будеть. Если ж бы хто через заповедь права не дождавшы, оное збоже пожалшы, с тое земли проч звез, тогды маеть того закладу половицу стороне противной шесть рублев, а другое половицы три рубли грошей подкоморому, а другие три рубли грошей вряду тому, от которого лист заповедный выйдеть, заплатити, которую заруку за отосланьем подкоморого вряд стороне, подкоморому и собе справити на именью того винного маеть, а збоже стороне з навезкою отдати або водлуг статуту заплатити винен будеть. А будет ли хто на своей власной земли сеяти, а другий ему то заповедавшы, а того бы правом не довел, ижбы его земля была, таковый сам маеть тот заклад вряду и стороне платити, а кгрунт и збоже пры том, хто сеял, маеть зостати. А хотя бы збоже погнило або стравлено было, того вжо он на противной стороне пойскивати не маеть, кгды ж, яко вышей доложоно, он то мел опатрити, яко бы с тое меры шкода збожю не была. Если бы се теж то трафило, жебы такое збоже пенное, на поли зложоное, до росправы судовное с поля покрадено, ино застанет ли при кгрунте тот, хто сеял, тогды ему тое жыто оный, хто прожно заповедал, винен заплатити, а собе в той шкоде винного искати. Зостанет ли пак с права при кгрунте тот, хто заповедал, тогды он, хто сеял, маеть ему тое збожье заплатити, а собе винного в том искати. Такая ж се заповедь и росправа маеть точыть и о сеножатях пенных. Пакли ж бы хто через дванадцать недель по заповеди стороны своее противное в такой речы перед подкоморого не позвал, тогды тому, хто сеял, волно будеть збоже або сено свое побрати. А будет ли в том часе покрадено, тогды тое шкоды на стороне противной искати. А тому, хто заповедал, вжо толко о кгрунт волно будеть и по оных дванадцати неделях правом чынити перед судом належным водлуг порядку, в артыкулех иншых сего ж розделу, вышей описаных. А на пенной земли нихто кгвалтовне не маеть збожья топтати и псовати, але се в том правне обыходить мають, яко вышей описано под зарукою вряду и стороне, вышей в сем артыкуле помененою.