Библиотека литературы Древней Руси. Том 4 (XII век)

И вижь како ти силу пламене.[294]

Человекъ же, почтен Богомъ, вещью вещь очищает. Да аще мы убо, тварь суще Божиа, от него сотвореною тварию действуемъ, якоже хощем, то что ны есть, возлюблении, паче наипаче помышляти о Бозе, егоже совета и премудрости нашь умъ ни худе достигнути не можеть, не токмо же нашь умъ, но и ти святии ангели и архангели и вся чиноначалиа. То несть ли ему лепо действовати от него сътворе[но]ю тварию, якоже хощеть, управляти великоимениты свой корабль. Смотрению же его несть ны ся лепо супротивити, токмо славити и благодарити. Якоже прияхом законная и благодатьная Святых Писаний от общего владыкы, Господа нашего Исуса Христа, Спаса и правителя наших душь, от святыих и божественых его апостолъ по дару и благодати и силе Духа, да держимся убо, возлюбленнии, за ту предлежащую надеждю, не укланяющеся ни на шую, ни на десно, да не в самое то дно падемся пагубы впадемся, но ко церковнымъ истиннымъ и честнымъ святителемъ гря[ду]ще и тако доидемъ вышния светлости въ приходящемъ царствии Господа нашего Исуса Христа, емуже слава купно съ безначалнымъ Отцемъ и пресвятым и благымъ и животворящимъ Духом всегда и ныне и присно и въ векы векомъ. Аминъ.[295]

Яко не ехион морьскый ставляеть шествиа кораблю, в немже храпяше тревечерний странен. А ехионъ есть в мори и малъ и худообиден живот, учитель бывает многажды плавающимъ.[296] Егда бо хощет быти буря и утишение, тогда же преже разумети муть, будущь от ветра, и, возлезъ на камыкъ твердъ, велми ся зыблеть, якоже волнам морьскым неудобь отвлещи, да егда видят се знамение гребци кораблении, и разумеють, яко приити имать буря ветрянаа. Никый же бо ястролог, ни халдей, на восход звездный зря, въздушьных муть знаменуа, сего научи ехиона, но иже есть морю и ветром господь худый сей живот велицей своей мудрости на истинное последование вложи. Ничто же бо преобидно от Господа, все видить безсонное его око, то все смотрить, у всего стоить, даа комуждо спасение. Да елико то ехиона не остави кроме своего места Богъ, то кольми паче изообилують щедроты его и человеколюбие до нас, уповающих на имя святое его. Устрааеть и промышляеть премудрено спасение наше и повелевает комуждо, якоже хощеть.

Егда же послан бысть Иона пророк въ Ниневгии, град великый, от Бога, да проповесть ему тридневное разорение, и выше силы своея пророку гневь воздвигшу на Бога, и от лица Божиа в Тарсъ бежати восхоте,[297] то же не ехион морьскый стави шествие того корабля, в немже Иона храпяше во дне корабля, тревечерний он странникъ, тревечерний — яко толико въ ките пребысть, странникь же — бежаниа ради. Не бо бяше время, ни днии алкиотистии тогда, но всемогущаа сила Божиа расбиватися кораблю створи. Пророкъ бо гневаяся бежаше, кораблю же възбрани чюдодеа Владыка. Множество бо видети бяше корабль пловущых семо и онамо без вреда, един же расбивашеся люте Ионы ради. И дотуда не препочи, донеле же гневливаго того бегуна, морю предав спасение, получи. Море же, его приим, препусти в пучины своя, пучины же, и приимше, предаша и въ чрево безсолнечному зверю, глубинному лву, рекше, киту. Чрево же китово, пророка приим, любо хотя, любо не хотя, Ниневгитьску граду скоро добра проповедника принесе; сладкоядный того во утробу приим, пакы же того на живот испусти, иже проведа слово Господне и спасению научи, и живот темь покааниа ради от Бога дарова. То кто се сотвори, не единъ ли Христос Богъ дивный въ славах, творяй чюдеса единъ!