Библиотека литературы Древней Руси. Том 4 (XII век)

Или яже въ Леугитьскых книгах о отрыгании ечь. Еда и то уведети тщеславие есть? Уча нас тех ради, како подобает быти чистымь. Надвое делящаго ради живота учить нас, да творим рассуждение благых деаний от супротивнаго. Жюющаго ради — яко да будемь боголюбиви. Якоже бо жюющии пищу отрыгають, тако подобаеть и нам день и нощь помышляти Божиа проповеди. Въдных же ради, имущих пера и чешюя, учи[т] ны: да якоже она суть горе вознесена, другаа же долняя вещи держится, тако подобаеть и нам со благыми деании и съ разумными совозвышатися, а не земными остаати. Птица же ради учить нас лихоимьства воздержатися, еже не во тме ходити; иже не во тме, но въ свете, се — еже в правде.[273]

Или на пятое лето от древа ясти плод,[274] а и то славитися? Но множества ради словес премину число словес и Вторый Законъ, и Судьи, и Руфь. Реку же и Еклисиаста, рекша: «Уже, треременноплете, не скоро ся преторгнет».[275] Не бо о ужи глаголет Соломон, но съветы удержаеть, всякъ бо советь и дума, аще утвердится, не подвижеться, и в чаание приходит. Того ради и ужем притчю Соломон сотвори.

Но о писании моем воспоминаю, иже къ князю твоему, к моему же напресну господину: «Понеже и пиавица оноа не устрегохся». Пиавицю убо глаголеть Писание и власть и славу, якоже не токмо египтяном, но и еросалимляном последует добро. А египтяне суть мирьстии, иеросалимляне же — мниси. Славы же и сласти не токмо мирьстии желають, но и мниси, еяже хотение комуждо нас последуеть и до гроба, аще бо и кто нас во глубоку старость доидеть, то и ту никакого же славолюбиа остатися не может. «Ибо и диктатору моему отнемогшу чювьствеными и вещественными расбойникы иерихонска прехода еже от Иеросалима». И диктаторъ — умъ сказается, тем же глаголет: «и убо уму моему отнемогшу»; чювьственыи же и безвещественыа расбойникы глаголет бесы; Ерихон же — миръ сказуется Се бо и въ Евангелии указает Господь нашь Исус Христос, глаголя: «Человекь схожааше от Иеросалима на Ерихонъ и в расбойники впаде и съвлекше и язвы возложиша на нь».[276] Едемь убо Иеросалимь сказается. Иерихон же — миръ, человекъ же исходяй — Адамъ, расбойници же — беси, прелщением бо техъ боготканныа одежда обнажися, раны же глаголет — грехи.