Статут Великого княжества Литовского 1588 года

Артыкул 22

Абы нихто повинное собе ве крви не поймовал .

Уставуем, хотечи то мети, абы подданые наши водле прав Божих и хрестияньских жили в малженстве  светом, прото абы жаден не смел повинное собе ве крви поймовати, ажбы минуло чворо поколенье по собе идучое так з отца, яко и з матки, а рожоных в тую личбу не личечы. Также абы не поймовали жон братьи своее не толко рожоное, але и стрыечное, также жон стрыев, вуев своих, ажбы минуло трое поколене по собе, на дол идучое, не кладучи в тую личбу рожоных. А где бы хто понял ведоме, умысльне жону, ве крви собе повинную так по отцы, яко по матце, албо невестку, дядиную над замеренье и уставу, вышей описаную, таковый кождый, будучы о то позван до вряду нашого земского, за слушным доводом маетности своее лежачое, а где бы лежачое не было, ино рухомое половицу на реч посполитую и на нас, господара, тратить, до столу нашого того панства, великого князства литовского. Также и жона тая, где бы, ведаючы о кревности, замуж шла, внесенье свое тратит. А мела ль бы свои властные именья, тогды и она половицу своих именей также на реч посполитую до столу нашого тратить. А такое мальженство предсе маеть быти розлучоно. А на другой половицы именей своих мають зостати толко до жывотов своих, а по смерти их тые дети, которые бы в таком малженстве, ве крви повинности злучоном, спложоны были, не толко до именей тых ничого мети не будуть, але и сами за бенкарты розумени быти мають. Одно ж тые именья по смерти таких особ спадуть на близских кождого з них водлуг линии рожаю. А над то такий мужчизна до жадных урядов припущон быти не маеть. А где бы се трафило, хто бы мел с першою жоною дети, не противку тому праву понятую, або унуки, а понял бы другую жону, ве крви собе повинную, такий заразом за припозваньем до уряду земского и показаньем того слушне жону тою маеть опустити и тратить росказованье свое над именьями и маетностью своею. А сынове або унуки, або кому бы се то по смерти его мело достати, заразом при его жывоте мають в моц оные добра взяти. А жоны такое именье такеж мають до рук своих взяти албо дети ее, естли бы мела с першым мужом набытые, албо где бы детей не было, ино близьские кревные. А самых мають ховати до смерти их, даючы им одежу и живность пристойную водлуг стану и можности именья. А естли бы тот дети сплодил с таковою повинною, не за добрые мають быти розумени, але за бенкарты. Пакли ж бы тые особы, в кревности такой до стану малженского злучоные, давали о собе справу, же бы се то мело стати в неведомости их о той кревности, тогды таковые винни будуть кождый з них самовтор с прыятелми, собе повинными, прысегнути на том, иж в тое малженство вступили, не ведаючи о кревности межи собою. А по такой присязе яко именей и маетности своее тратити не будуть, так и дети, в том малженстве спложоные, за дети учстивого ложа розумени будуть и от именей по смерти таких родичов отдалены не мають быти. Але сами тые малжонкове предсе розлучоны будуть, а то, естли им по той такой розлуце волно будеть в ыншое малженство отдаватисе, розсудок права духовного промежку их узнати маеть. Также естли бы се показало за припозванем до суду кгродского, ижбы хто, жону свою венчальную живую маючи, другую понял, тот ничым иным, одно горлом маеть быти каран. А также и жона таковая, естли бы, ведаючы о другой жоне его жывой, замуж за него пошла, таковому ж каранью подлегають.