Статут Великого княжества Литовского 1588 года

Артыкул 11

О вдове, которая зостанеть з детми, лет не дорослыми, и о детех без опекунов отумерлых.

Уставуем: которая бы вдова зостала по мужу своем з детьми малыми, лет не дорослыми, а муж бы опеку детей и именей ей, жоне своей, записал, тогды она водлуг тестаменту и опису мужа своего будеть тою опекою владнути, на всем се слушне и пристойне радечи и справуючы, яко бы было без шкоды детиное и утраты а знищенья именей их. Вед же где бы такая белая голова в той опеце, ей от мужа ее звероной, нерадне се заховала и детям именье и скарбы утрачала, тогды стрыеве, а не будет ли стрыев, и иншые близские тых детей мають ее о то позвы притягнути на рок певный завитый перед уряд судовый земский. И доведуть ли того, же утрачаеть, маеть опеку, именье и дети спустити кревным, а сама зостати на оправе своей. А не будет ли оправы, тогды мають ей выделити ровную часть межи детьми, которую будеть держати и ее уживати водлуг того, яко около таких невенованых жон вышей в сем розделе ест описано.

А вед же утрата от нее на йменьях инакшая не можеть се показати, одно естли бы непобожными податками, винами, серебщизнами людей в оных именьях обтяжала, гумна и иные статки домовые нерядне роспрошала, а ничого в дом детям не прыбавляла. А где бы стрыев и иншых кревных не было, тогды суд земский оного повету за донесеньем ведомости до них маеть такую утратную вдову позвати перед себе на роки судовые именем детей роком завитым. А там, где се тая утрата такая окажеть, мають опеку тую от нее взяти. А на тое местце вряд судовый земский мають опекуна, в том повете добре оселого, там же на тых рокох установити и в декрет свой меновите вписати, а дети, именья и вси скарбы ему, врядовне все списавши и до книг уведши, подати, который опекун маеть вси в целости до лет детинных держати и так ся заховати, яко в артыкуле четвертом розделу шостого описано ест. А в том часе, ним тую утрату по ней обачать, она бы што детем утратила, тогды будеть тую всю шкоду детем своим платити з вена або з властного именья своего. А где бы отец з сего света зшол, детей своих и именей, им належачих, никому в опеку не злетившы и не описавши, тогды опека детей таких, лет не дорослых, и именей их належати будеть стрыем або и иным близьским. Нижли для лепшого и пилнейшего выхованья дети малые от матки своее до опекунов браны быти не мають, але мають зостати при матце: девка — до пойшстья ее замуж, а мущизна — до лет таких, в яких вжо на науку до школы давати годно, то ест до семи лет. А опекунове таким детем, поки при матце будуть, опатренье и выхованье слушное водлуг можности именья детиного и узнанья врядового на одежу и выживенье на кождый год повинни будуть давати до рук матки их. Але матка девок своих без рады и ведомости опекунов их в стан малженьский змовляти и отдавати не маеть.