Статут Великого княжества Литовского 1588 года
- Автор: Сапега Леў
- Язык: белорусский
- Жанр: Европейская старинная литература
Электронная книга - «Статут Великого княжества Литовского 1588 года». Краткое содержание книги:
Артыкул 105
О потварцох.
Забегаючы тому, абы люди злые от потварей на людей невинных повстягнены были, уставуем: естли бы хто, пробачившы боязни бозьское и встыду людского, речы якие змышленые потварные до суду донес и справы тое на кого попирал, а то бы се на него первый раз явными доводы и слушными знаки показало, тогды за то стороне той, которую спотварыл, вины повинен будеть заплатити шесть коп грошей. А покажет ли ся то вторый и третий раз, тогды за кождым разом по тому ж стороне противной платити повинен будеть. А естли бы и четвертый раз тое ж ся на того ж от кого колвек показало, тогды вжо таковому ноздра розрезана быти маеть, и вжо таковый потом абы николи до жадного вряду и до справы прыпущон не был. Вед же ся то розумети маеть толко о явных потварцох, а не о тых людех, которые або для убозства, або для якое простоты и неумеетности своее, албо теж для якого прыпадку права своего собе не доведеть, тые за потварцы розумени и караны быти не могуть.
Роздел пятый. О оправе посагу и о вене
Артыкул 1
Которым обычаем отец, выдаючы дочку свою замуж, маеть обваровати и упевнити записанье вена от зятя.
Теж уставуем, иж кождый обывател того паньства, которого ж колве будучы стану, выдаючы дочку свою замуж и дучы за нею посаг або выправу водлуг доброе воли своее, напервей, нижли дочку выдасть, маеть от зятя взяти запис под печатью и с подписью руки его, хто писати умееть, и под печатми людей добрых, которым он на третей части именья своего лежачого оный посаг, то ест гроши готовые, золото, серебро, перла, каменье дорогое, совито шацуючы, а иншую выправу — шаты и всякие уберы, и хусты белые, кони, колыбки и вси иншые речы рухомые — одным шацунком, без совитости кладучы, описати маеть по тому, яко нижей описано. А потом оный запис тот же зять на первшых рокох земских, судовне отправуючых, перед судом земским оного повету, в котором тая оселость, на чом вено записано, лежати будеть, сам очевисто сознати и в кгниги земские записати дати маеть, и на тое сознанье свое, же его маеть на вряде учинити, повинен будеть зят отцу лист свой особный под заруками дати. А згодят ли ся на то обе стороне, жебы такий лист веновный на вряде кгродском, не ждучы земских роков, был сознан, то теж волно будеть. А потом тот запис отец, матка або близские жоны его перенести мають до книг земских, и вжо таковая оправа маеть быти у кождого права держано. По тому ж ся матка, братья, стрыеве и иные близьские около выданья в стан малженский девки народу шляхетского заховати и первей выданья ее замуж оправу от зятя одержати мають. Если ж бы хто листу своего веновного, будь перед земским або кгродским врядом, водлуг постановенья, с прыятелы жоны своее на то вчиненого, не сознавшы первей року, на тое сознанье замероного, з сего света зшол, тогды жона его або ее приятели мають того ж часу, яко наборздей быти можеть, тот запис его веновный на вряде земском або кгродском оповедати и оказати и до книг его записати дати. А потом, кгды тая реч до права прыйдеть, а дети, близские мужа ее не давали бы веры тому листу, тогды она, поставивши печатники, которых печати у того листу веновного будуть, а то если бы были печатники живи, маеть пры их сведецьстве еще прысегу учинити, же то ест лист правдивый, ей от мужа ее даный, а не будет ли жывых печатников, то предся она ж присегою своею того листу подперети маеть. А по таком доводе тот запис пры моцы зостанеть. А пакли бы отець, матка, брат и хто з близьских, выдаючы девку замуж, таковое оправы и вена, яко вышей описано, от зятя не одержал, таковая девка по смерти мужа своего внесенье тратить, хотя бы великую суму за собою внесла. А ведь же предся яко шляхтянце дети або близские повинни будуть за венець дати трыдцат коп грошей, а то естли бы замуж пошла. А где бы замуж пойти не хотела, тогды межы детми и межы близьскими в ыменью мужнем будеть ровную часть именья держати аж до смерти своее.
А естли бы оного шляхтича именье тридцати коп грошей не стаяло , тогды теж водлуг того з оного именья маеть ей выделена быти четвертая часть, которую будеть держати толко до живота своего, хотя и за другого мужа пойдет. А похочут ли потомкове и с тое четвертое части ее скупити, тогды таковая часть вся водлуг сего статуту через вряд шацована быти маеть, а тое ошацованое сумы толко половица, а не болшей дано ей будеть. А где бы которая жона, не маючи от мужа вена описаного, первей мужа з сего света зышла албо и по смерти мужней седела до смерти своее на части именья его водлуг навуки, вышей в сем артыкуле описаное, тогды по смерти ее дети, близские ее венца ее пойскивати не мають.
Артыкул 2
Яко маеть муж жоне записати вено.
Теж уставуем: хто бы хотел записати вено жоне своей, тогды маеть ошацовати вси именья свои и на третей части всих именей своих, будь в каждом именью албо одно которое, албо колко именей в третюю часть вынявшы и вылучившы, маеть противко внесенья жоны своее, яко верху першом артыкуле описано, вена ей записати. И коли будеть тая жона его на третей части именей мужних вено описаное от него мети, а он бы потом умер и дети по собе зоставил, а тая жона пойдеть за другого мужа, а естли дети або близские усхочуть ее с тое третее части за живота ее вывеновати, тогды мають всю суму пенезей, яко будеть в листе описано, заплатити, тож тое именье к рукам своим взяти. А естли ж будуть дети або близские ждати смерти ее, а того именья за живота ее з рук не всхочуть выкупити, тогды повинни будуть оное внесенье ее, што в тот в дом их унесла, по смерти ее заплатити тому, кому она отпишет. А привенку, што будет записал отец их напротивку внесенья совито, того не повинни платити. А она теж не маеть никому того привенку отписывати, кром толко волно будеть отписати внесенье свое. А естли бы никому не отписала, а детей не мела, або бы и мела, але бы тые дети еще за ее жывота або и по смерти ее, лет не доросши, або и доросшы лет, а права бы своего ни на кого не влившы, померли, тогды маеть тое внесенье ее вернено быти в дом тот, с которого вышла. Вольно теж кождому жоне своей отписати речы свои рухомые так, яко и кождому обчому, то ест золото, серебро, шаты, кони ездные и иные речы, кром зброй, стада и челеди дворное, и быдла дворного. А вед же и того всего, то ест зброй, стада, челяди дворное и быдла дворного, и теж збожя вшелякого так, яко и именья лежачого, третюю часть жоне отписати волно, абы, седячи на именью, мела чым службу нашу господарскую и земскую с третее части именья заступовати. А дети або близские, кгды будуть ее с тое третее части скуповати, тогды, прынявшы она от них вено свое, винна будеть им тую часть третюю только з двором, з будованьем дворным, з бояры, з людми тяглыми и с челедью дворною подати. А иншие речы, ей записаные, яко зброя, стадо сверепе, быдло дворное и збожье, не всхочет ли она чого с тых речей по доброй воли своей детям або близским при именью зоставити, то все при ней зостати мает. А так подле тое уставы нашое мають се заховати вси подданые нашы и на потомные часы. А хто бы назвыш тое уставы нашое учынил, а што неслушне жоне своей за внесенье ее обычаем веновным записал, таковых записов не хочем меть моцных мы сами и потомки наши, великие князи литовские. Прото отец, матка, братья або иншие близские, еще не выдавшы девки замуж, мають первей того смотрети, естли бы того зятя его третяя часть именья совито стояти могла противко внесенья тое девки, на чом бы ей против того веновати мел. А где бы третяя часть не стояла против внесенья, тогды отец або тот, хто ее выдавати будеть, маеть за тую суму пенезей, што бы по ней мел, дати купити именье и по той девце зятю дати, а зять предсе жоне своей за то, што бы особно взял суму якую, маеть оправу вчинити на третей части именья своего властивого. А того именья, которого отец, брат або близский, купившы, по той девце дасть, мають сполу уживати аж до живота мужнего. А по животе мужнем она яко свое властное маеть держати весполок з венком своим, будучы тым волна шафовати яко властностью своею. А где бы жона первей мужа своего, не записавшы мужу и никому иному такого именья и детей по собе не зоставившы, з сего света зышла, тогды тое именье маеть прыйти в тот дом, с которого она вышла. А естли бы дети по собе зоставила, тогды тое именье на дети ее спадеть.