Библиотека литературы Древней Руси. Том 7 (Вторая половина XV века)
- Автор: Коллектив авторов
- Серия: Библиотека литературы Древней Руси #7
- Год: 1999
- Язык: русский
- Жанр: Древнерусская литература
Электронная книга - «Библиотека литературы Древней Руси. Том 7 (Вторая половина XV века)». Краткое содержание книги:
И мы же ему сице рцемъ: «Радуйся, новый страстотерпче, таковы беды подъя, ниже инъ никтоже! Радуйся, въине, иже онии волкы отгнавъ ни оружиемъ, ни стрелами, но великымъ своимъ разумомъ!»
Но князь же великий Борисъ Александровичь хвалу въздая Богови и его пречистой матери и нача съвет съвещевати со своемъ епископомъ и со своими князьми и боляры, и да бы изгыбший градъ въставити. И вси иже людии с радостию совещашася. Но и малыми деньми той великий градъ поставленъ бысть, но и въси людие радостно ликоствуют, и глаголюще: «Многаа лета ти, великий князь Борисъ Александровичь! Но якоже остеняеши грады, и остеняетъ же тя самого Господь Исус Христосъ. Но понеже бо не видехомъ и в первая лета тако устроенна и украшенна великого града Тфери, но якоже и ныне мы видимъ».
Но мню вера оного отца, великого князя Олександра, Богъ тамо предводитъ, и плодъ его въ всю бо землю изыде. Рече: «Боголюбна держава твоя и в конець вселенныя христолюбивая твоя дела, но въ всю землю и в конци ея».
Но и от всехъ же земль прихожааху къ нему и великиа дары приношааху к нему. Но ово от царствующихъ местъ, а ово от Рима. И не токмо же от верныхъ царей честь велику и даръве приимааху, но и от неверныхъ царей. Но не от инехъ слышахъ сиа, но самовидець есми тому, ино еже приидоша после от далекиа земли, от Шаврукова царьства,[194] и ихъже несть просто слыхано в нашей земли. Таковое имя тъй орде, но понеже бо неудобъ входима нашими устами за долгость пути. И принесоша к великому князю Борису Александровичю многыя дары: камъкы драгия и отласы чюдныя. Но азъ же есмь грубый невежа но не доидох тамо, и идеже ми ихъ было число видети. Но и токмо видехъ многы бремена, носима человекы. Овии глаголютъ двадевять камок, а инии же глаголютъ 3—9. Но не виде числа, но токъмо виде: много. Но еще же и иныя многы дары княземъ и боляромъ даша. И князь же великий Борисъ честь великую подаваше имъ противу, но не токмо за дары, но и за великиа труды ихъ, но понеже бо от толь далекиа земли, а с толикими многыми дарми, и идоша бо 9 месяць от своея си земли до великого князя Бориса Алексанъдровича.
Но способствуйте же ми и вы. Истинне но вижете славу и честь великого князя Бориса Александровича. Но отколе славы и чти собе не приобрете! И вижте же и чюдныхъ его весей делание, но градная его зданиа, пасый же и строя Богомъ покрываемый градъ Тферь благословениемъ Ивановымъ и Александровымъ, но якоже рукою Моисеовою и Аронею. И всеблагый же во Троици Богъ славимый и да умножитъ лета летомъ великому князю Борису Александровичю, но княжение его въ тишине да устроитъ, но яко да и мы въ его государстве тихо и безмятежно поживемъ ныне и всегда и в векы векомъ.
Лета 6953. Некто от прирожениа великыхъ князей московъскыхъ, зовомый князь Дмитрей, а прозваны от людий Шемяка, сынъ князя Юриа Дмитреевича, и той бе в докончание с великымъ княземъ Василиемъ Московьскымъ, но, реку же, и с велимъ княземъ Борисомъ с Тферскымъ. Но честь велику и дары многы от нихъ взимааше. Но понеже бо ни помяну о томъ и еже нихъ к нему любы, но якы некая ехидна гневомъ дыша, и хотя убити брата своего старийшаго великого князя Василиа,[196] но еже и сотвори. Но прииде от града Углеча, и градъ Москву изгониша безвестно, и възяша его. А с нимъ братъ его, князь Иванъ Можайский. А великому же князю Василию тогда бывшю в монастыре Святыя Троица, еже зоветься Маковець,[197] въ обители старца Сергиа. И князь же Дмитрей ни крестного целованиа убояся, ни любве великого князя Василиа к себе не воспомяну, но посла тамо брата своего, князя Ивана, и повели его изымати. А преже того таковымъ крестнымъ целованиемъ укрепишася, но яко и грамоту проклятую межи собя написаша, но и старца Сергиа в поруку вписаша,[198] якоже не помыслити никоегоже зла брату на брата. Но князь же Дмитрей крестное целование забылъ и поручника старца Сергиа выдал. И изымавъ великого князя Василиа без вины, и приведе его на Москву, и ослепи, и посла его в заточение, иже в прежереченый градъ Угличе и сь его великою княгинею Мариею, а самъ седилъ на велкомъ княжение. А не помянух пророческого словеси: «Но что ся, о злобе силъный, умыслилъ еси неправду. И сего ради разрушит тя Богъ, и въсторгнет тя от села твоего и коренъ твой от земля живущихъ».[199] И еже и бысть. Но тое же зимы княгиню великую Софию послалъ въ Галичь,[200] а дети же великого Василиа, князь Иванъ да князь Юрий, побегоша в Муромъ, а с ними же князей и боляръ много, и седоша в Муроме.
194
...от Шаврукова царьства... — Царство Шахруха, сына Тимура, бывшего с 1409 по 1447 г. номинальным властителем всей территории, находившейся под властью Тимура перед его смертью. Столицей этого обширного царства (включавшего Среднюю Азию, Афганистан, Иран и Пенджаб) был Герат.
195
...от летописца вкратце... — Летопись, используемая далее в Слове, не совпадает с так называемой Тверской летописью или Тверским сборником (ПСРЛ, т. XV) и во многом расходится с нею.
196
...хотя убити брата своего старийшаго великого князя Василиа... — Подробный рассказ об этих событиях содержится в «Повести об ослеплении Василия II» (см.: т. 6 наст. изд., а также известия Севернорусского летописного свода 1472 года в наст. т.).
197
...еже зоветься Маковець... — Название «Маковец» носит гора, на которой Сергий Радонежский основал Троицкий монастырь.
198
...старца Сергиа в поруку вписаша... — Сергий Радонежский (ок. 1321—1391 гг.), основатель и игумен Троицкого монастыря, был свидетелем при составлении в 1389 г. завешания Дмитрия Донского (вокруг которого велись споры между его внуками), но в договоре Василия II с Дмитрием 1441 г., предшествующем феодальной войне, он упоминаться как свидетель, естественно, не мог. Однако в «Повести об ослеплении Василия II» Василий также упоминает Сергия: «...целовали есмя животворящий крестъ и сию икону... у сего же чюдотворцева гроба Сергиева».
199
...«Но что ся ο злобе силъный... от земля живущихъ». — Ср. Пс. 51, 3—4, 7.
200
...княгиню великую Софию послалъ въ Галичь... — Согласно великокняжеской летописи, мать Василия II была сослана в Чухлому.