Библиотека литературы Древней Руси. Том 13 (XVI век)
- Автор: Коллектив авторов
- Серия: Библиотека литературы Древней Руси #13
- Год: 2005
- Язык: русский
- Жанр: Древнерусская литература
Электронная книга - «Библиотека литературы Древней Руси. Том 13 (XVI век)». Краткое содержание книги:
Раб же Божий игумен Зосима болшими подвиги начат простиратися, Вышняго себе прибежище положи,[177] жестокое прохожаше житие. И възгради гробницу над мощьми блаженаго Саватиа и в ней постави иконы — образ Господа нашего Исуса Христа и Пресвятыа Богородица, приходити на поклонение братии.И свещу повеле поставити над гробом преподобнаго. И съвещевает сь братиею, еже бы велети и образ написати блаженнаго и поставити на гробе. По мале же времени привезоша из Новагорода икону от Иванна, оного купца, преже реченнаго, погребшему честно тело святаго съ игуменом Нафанаилом на Выгу у чесовни. От того же времени тъй Иван и Феодоръ, брат его, велию веру иместа на Соловки къ Спасу и Пречистей Его Матери и их угодником преподобному Саватию и Зосиме игумену; и вдаша игумену Изосиме образ блаженнаго Саватия. Он же постави ю на гробе святаго. И во вся дни и нощи по всяком славословии церковнаго правила игумен и вся братиа приходяще ко гробу святаго поклонятися образу Господа нашего Исуса Христа и Пречистыа Богородица и их угоднику блаженому Саватию.
Игумен же Зосима приходя в нощи, поя и молясь, имы во устех псалмопение непрестанно и коленопреклонениа многажды творяше всю нощь даже и до заутрении къ образу Владыкы Христа и того Пречистыя Матере, над гробомъ стоящих блаженнаго Саватиа, к преподобнаго образу, яко к живу глаголаше: «О, рабе Божий, преподобне, аще и телом скончал еси свое житие от земных селений, но духомь неотступно буди с нами, молясь Владыце Христу Богу; руководьствуй нам и достойны представи шествовати божественныя его заповеди съвершены, якоже рекшу въ святем Еуангелии, „взем крестъ, последовати по Себе”.[178] Ты убо, преподобне, имыи дерзновение ко Господу и Пречистей Его Матери, буди молитвеник о нас, недостойных рабех твоих, живущих въ святей обители сей, ейже ты бысть началник! Тако и ныне буди помощник Богомь събранному стаду словесных овец, еже о Христе братству сему! Да твоими молитвами к Богу невредими будем, пребывающе на месте сем, от враг видимых и невидимых и человекъ, зло творящих святому месту сему! Да всегда съхраняеми ходатайсътвом Ти, славу възсылаем Отцу и Сыну и Святому Духу, ныне и присно и в векы веком! Аминь».
И по сих рабу Божию игумену Зосиме пребывающу во мнозех трудех и сугубых пощениих лета доволна. Лукавии же человеци, от врага поощряеми, многа зла сътворяху обители блаженнаго, насилуя и оскорбляюще, да како бы възмогли изгнати его от места того святаго.
Святый же съветъ сътворяет с братьею, яко пойти ему в Великый Новград и молити архиепископа, дабы ему был помощник от обидящих человекъ и творящих пакости его манастырю. И начат строитися к путному шествию. И повеле ударити в било — братии съшедшеся, начинат молебнаа к Господу Богу и Пречистей Его Матери за благоверныя князя и архиепископа и о устроение земьском, и о всем православном христьянъстве, и на помощь призываа блаженнаго Саватия, еже способьствовати молитвам его. И молебьная съвершив, некых от братии поимь с собою, и поиде в путь свой, шествие творя по морю к Великому Новуграду. И стройно бяше плавание блаженному по морю и по рекам, и по езером.
И не по мнозех временех достизаеть Новаграда; и прииде къ архиепископу.[179] И поведано бысть о нем. Архиепископъ же, видев и благослови его, и въпрошает о братии, о строении манастыря. Зосима же все поведа ему, и въстав от места, поклонся архиепископу до земля, моля его и глаголя сице: «Господи мой и владыко святый, буди нам милостивъ, заступая нас от оскорбляющих лукавых человекъ, многажды зле належаще на ны! Приходят болярьстии раби, населници, и пакости многи творяще, не дающе нам округ острова рыбъ ловити и ина многа насилствующе, хотяще место разорити и нас изгнати!» Отвеща архиепископъ: «Азъ, отче, помагающу ми Богови, готов есмь пособьствовати манастырю твоему, а се оповедаю боляром первым, съдержащим град».[180] Зосима же поклонся архиепископу и отиде. И приходя к боляром, моляше их, таже глаголяше о скорбех бывающих ему. И вси боляре, съдержащеи град, съ мнозем тщанием обещашася помагати манастырю его.
И прииде к некоей болярыни, именем Марфе,[181] молити ея от скорбии населникъ ея, приходящих на остров Соловецскый и многи пакости творяще манастырю преподобнаго, и хотя ей изглаголати, еже творят раби ея обиды многи. Она же, услышав от рабъ своих о вещи, чесо ради прииде к ней блаженый, и разъярився, повеле его отслати от дому своего, не восхоте благословениа. И удалися от нея.
177
...Вышняго себе прибежище положи... — Пс. 90, 9.
178
…«взем крестъ, последовати по Себе». — См.: Мф. 16, 24; Мр. 8, 34; Лк. 9, 23.
179
...и прииде къ архиепископу. — Имя архиепископа, занимавшего Новгородскую кафедру во время второго путешествия преп. Зосимы в Новгород, не названо в Житии. Однако, как следует из «Жалованной грамоты Великого Новгорода Соловецкому монастырю на Соловецкий и другие острова», данной во время второго посещения Новгорода преп. Зосимой, этим архиепископом был святитель Иона (1458—1470).
180
«...а се оповедаю боляром первым, съдержащим град». — «Боярами» в Новгороде называли члены «совета господ», в который входили «степенные» и «старые» посадники и тысяцкие, а также старосты пяти концов Новгорода.
181
...к некоей болярыни, именем Марфе... — Боярыня Марфа — известная Марфа Посадница, вдова новгородского посадника Исака Андреевича Борецкого.