Библиотека литературы Древней Руси. Том 8 (XIV - первая половина XVI века)
- Автор: Коллектив авторов
- Серия: Библиотека литературы Древней Руси #8
- Год: 2003
- Язык: русский
- Жанр: Древнерусская литература
Электронная книга - «Библиотека литературы Древней Руси. Том 8 (XIV - первая половина XVI века)». Краткое содержание книги:
Столпъ во отоце том поставити повеле и себе на немъ в злате написати повеле, словеса же греческая на нем написа: «Александръ, царь македоньский, иже весь светъ прешедъ и до отока того доиде, и Макариньский отокъ видехъ, и ту елинских боговъ не видехъ и не обретохъ, яко елиньстии бози в далнеиших ада, а тартаре, в геоне мучими суть со дияволом повелениемъ Бога Саваофа. Да аще другий хто приидет во отокъ сий, на вся глядай, внутр же не поглядай, Богу бо единому возможно, чаловеку же ни единому приступно». И тако в Макариньский отокъ внииде. Макарии бо по сербьскому языку наричютца блажении. Ко Иованту приступивъ, Александръ рече: «Возвести ми, многомудрый блаженый Иованте, что напреди есть?» Он же к нему рече: «Река сия, в нейже отоцы наши есть, Акиянъ наричется, всю вселенную та обтечетъ и вси реки в ню текутъ. По оной же стране гору, яже зриши, овошми различными украшену, то есть место вами зовомо Едемъ, иже Господь Богъ Саваоф искони летомъ насади рай на востоце. И ту Адама, праотца нашего, вселил бяше. Он же завистию дияволею испаде, заповедь Божию преступити, из рая изгнанъ есть». Александръ же к нему рече: «Могу ли, дошед, рая видети?» Иовантъ же к нему рече: «Не имат душа во плоти рая видети, горою бо великою медяною огражденъ есть, во вратехъ же его шестокрилатии херувими с пламенньши оружии стоятъ. Но поиде, Александре, откуду пришел еси, последуй же четыремъ рекамъ, иже от рая идут; во вселенную поиди, иного паче сихъ видети не можешъ. Рекам же симъ имена суть: Гион, Фисон, Тигръ, Ефратъ[89]». Александръ же из отока поиде, вси его любезно целоваху. Александръ же к нимъ рече: «Аще не бы ми скорбъ за македонян, яко в чюжих землях погинуть, зде с вами остал бых, и во второе пришествие Божие близу рая обрелся бых». Иовантъ к нему рече: «Поиди с миромъ, Александре, все приимъ землю, самъ в нее приидеши».
И на десную страну устремися со востока. И тако оттоле поиде Александръ с войском своимъ, 10 дней прешедъ, поля некоего доиде, ровъ глубок на поли томъ обрете. И сего преити не могъ и комару на немъ гвоздену сотвори, и ту войско свое преведе вся, на комаре слова написа греческии, египетски и перска: «Александръ царь на краи земли дошед и по сей комаре войско свое преведе». И оттуду четыре днии прешед, темную землю наиде.
И ту со избранными македоняны на кобылах, имеющих жеребцы, жеребцы же на станохъ остави, они же в темность внидоша. И нощъ ходиша едину. Антиоху же лечити войско повеле. Сам же рече к нимъ, пошедшимъ, чтобы всякий человекъ взял, хто что возмет, камен или древо ли, или персть. И хто повеление сотворилъ, много злата изнесоша, а хто повеления не сотворилъ, и тые много и каялися, изнесоша бо каменья драгаго и бисер великий и протчая.
И оттоле четыре дни идоша и сретоша Александра две птицы человекообразни и к нему рекоша: «Александре царю, почто гневъ наносиши на себе в земляхъ сих? Но поиди немедля, ждет тебе Индея вся и Пор великий; господарство же его пришед разрушити имаши. И на десную страну походи и дивнейшее первых узриши».
Александру же идущу от темные земли 6 дней, езера некоего дошед, и ту станомъ своимъ сташа и ясти искати начаша. Кухор же Александров, повар, рыбы сухие омыти во езере томъ хотя, егда же ихъ в воду измочи, и рыбы сухие ожиша и во езеро втекоша. Александръ же се слышавъ и подивися и войску всему купатися повеле, и с конми их искупавшися, вси здрави и крепцы быша.
89
...Гион, Фисон, Тигръ, Ефратъ. — Эти сведения о четырех реках восходят к Библии; в средние века Гион (Гихон) отождествляли с Нилом, Фисон с Индом (или Гангом), т. е. главной рекой Индии.