Библиотека литературы Древней Руси. Том 8 (XIV - первая половина XVI века)

Кандарвуша же и Оризвана призвати повеле и к ним рече: «Почто государя своего убили есте?» Они же к нему рекоша: «Смерть его тебе государя сотвори». Александръ же к ним рече: «Аще благодателя своего убили есте, мене ли, чюжаго, не убиете?» И се рекъ, обесити их повеле, глаголя: «Проклят есть, иже государьского убийцу хранит». Пришедъ во градъ, с Роксаною венчася. Роксана же паче всехъ женъ земьских краснейшии не токмо лепотою образною, но и душевными добродетелми украшена бысть.

Александръ же писал листь к матери своей Алимпияде в Македонию и наказателю своему Аристотелю: «Александръ, царь над цари промыслом Бога вышняго, госпожи и матери моей, царицы Алимпияде и Аристотелю, моему учителю, пишу радоватися. И се есть седмое лето, яко отоидох оттуду, за всих седми летъ не писах вамъ, ни поручихомся, иже в нас. Се же согрешенне несть от нас ни от любве сие есть, но, сопротиву великому царю Дарию стоящим нам, и его разбивающе, от него разбиваеми, и о семъ ум свой упразнивше, писати к вам не поспехом. Ныне же ведомо да есть, яко з Дариемъ 3-жды бившеся и его победихом. Се же персы видевше, царству моему поработившеся вси. Дарий же живота изменися, а дшерь свою Роксану в место дара мне дал есть. Аз же безмерную ея красоту видев, жену себе понял. Ведомо да есть вамъ, отнележе женьская любов сердца моего не обняла ест, ни ко мне мысль не нахожаше о вас и о домашних; да отнеле же женьскою любовию в сердце устрелен бых, оттоле о мирских мислити начах; ни убо вменях дотоле, где убити мя хотяху, где ли убити хотехъ, яко есми зде в Персиполи граде великом с Роксаною царицею от персъ славимъ, всей Персиде царь. И вы о соби пишите к нам и сами в Македонии здрави будите».