Библиотека литературы Древней Руси. Том 8 (XIV - первая половина XVI века)

И в той час Филон от Персиды с великою силою приспе ко Александру, с тысячью тысяч людей вооруженных, и 100 тысяч коней зобных Александру приведе, 1000 тысячь камелий, иже на потребу, и принесе ему диядиму многоценну и стему безценну от Роксаны царицы, и 1000 литръ злата. И ту стоя Филонь, рече: «Милый мой государю и всемъ царемъ царю, великий хинкире, и наасаре,[91] Александре царю, не подобает намъ противу индейскому царю Пору много корисмати, но скоро на них наехавше, яко не на храбрых и не искусных быти». Александръ же о пришествии Филонове радостень бысть велми. Филоново же пришествие уведевше, македоняне охрабрившеся велми, индеяне же слышавше, страх великъ объятъ их. Филон же ко Александру рече: «Великий царю Александре, елико Поръ противъ насъ стоитъ, толико войско его храбрейши бываетъ; да пусти на них мене с покойнымъ войском моимъ». Александръ же к нему рече: «Порово войско силно есть велми, река же сия непроходна есть конскими ногами». Филон же к нему рече: «Македонскии десницы непоколебими суть, македоньским же конем ниедина река не стоит. Нароком же твоимъ облецы мене и молитвою твоею облецы мене, и на Пора пусти мене, много бо может нарокъ силнаго господина и честна; нарокомъ твоимъ, Александре, и горы не стоят и реки, ни луги. Ниподобно тебе с Пором битися, много бо царей подручных тобе есть, якоже Поръ; мне подобает с ним битися, а не тебе, он бо есть индейскии царь, аз же по твоей милости перский господинь есми, перское бо господство индейскому равно есть». Александръ же к нему рече: «Како реку прейдеши?» Он же к нему рече: «Якоже ты узриши». И Александръ дасть ему 1000 тысячь людей оруженных и пеших другую 1000 тысяч. Филон же повеле всякому воиннику пешего за собою на конь взяти с мечем. И стоящим; и егда войско Порово нача обедати, тогда Филон со всемъ войском удари в реку и сию из места изгнаша на поле пред ними, сквасишася мнози, заднии же посуху преидоша. Прешедшим же реку, пешии с коней сседоша, и на околъ наехавше, сечю велику сотвориша конницы и пешии. Александръ же Филонове храбросте подивися и тако сотвори, якоже Филон, реку преиде. Индеяне же много бившеся и побегоша. Александръ же сихъ постизая, многих убивая и иных живых ухватиша. Порово войско 1000 и 500 людей убиено бысть. Пору же из боя бежащу и тако, плача, глаголаше: «Увы мне, окаянному, како силнии падоша, а немошнии препоясашася силою; како македоньский царь Дариеву силу победивъ и у космы мои, яко чинакъ, увязе и силу мою разруши. Сих ни Афилонская река воздержати возможе». Александръ на околъ Поровъ наиде, пленити землю индейскую посла. Поръ же в столной во град свой вниде и ко околнимъ языком посла и глаголя им: «Ведомо да есть вамъ, друзи мои и братия моя, яко вселенную приимъ и Дария царя убивь, Александръ, македонский царь, и до нас доиде; трижды мя разби и силу мою разруши, на Афилон реку пришед, и землю мою пленить. Да молюся вамъ на помош мне приити, аще бо меня разорит, вы постояти пред нимъ на можете». Се же слышавше языцы, иже на северной стране, в той час Пору на помош приидоша, бысть же их 6000 тысячей, Поровых 4000 тысячей, Александровых же 1000 тысячей. Обои же направишася, на бой приидоша.