Библиотека литературы Древней Руси. Том 8 (XIV - первая половина XVI века)

Пор же индейский царь, по вселенней войско свое собравъ и преписати повеле и обрете их 1000 тысяч и десят тысяч лвов, иже бяше на брань учинены ходити. И сию неизреченную Порову силу македоняне видевше и прочии языцы, убояшася зело, помыслиша Александра предати Пору, индейскому царю. И рекоша: «Сами живот свой испросимъ у него», в Македонию бежати помышляху. Птоломей же, воевода Александровъ, сие слышав, Александру исповеда. Александръ же, сие слышав, войску свою къ собе призвав и к ним рече: «О любимии македоняне и велемошнии, всехъ языкъ силнейшии и лутчии витязи, таковы светъ приимше и всесилнии победивше десница, а ныне от нехрабрых и непотребныхъ убоястеся индеянъ. Не токмо они насъ изести имуть, яко вамъ мнитца. Да аще вас омерзил есми, вы сами убийте мя. Аще ли вамъ Поръ что сотворити может, самъ аз к нему добра вашего для иду. Но ведомо вамъ есть, македоняне, аще Александра изгубите, нектому Македонию узрите, но порабощение языком всемъ будете и зле в чужих землях умрете. Не такую бо честь вы у отца моего Филипа и от всехъ языкъ имеете, якоже вы со мною ныне царствуете. Ведомо да есть вамъ, яко мне 3 лакти доволе есть земли, вы же во вселенней укрытися не можете. Ведомо да есть вамъ, яко отколе неверу сию ко мне приказасте ныне, на конец летомъ поработитися имате государьство ваше перьскому языку и вас всехъ до конца погубивше и отчинную вашу и землю и Македонию приимутъ. Азъ же ныне к Пору самъ иду на бой, аще сего убию, то аз есми побежая землю, а не вы; аще ли мене убиет онъ, вы вси зле имате умрети». Македоняне же, сие слышавше и много плакавше, ко Александру приступиша и рекоша: «Великий царю Александре, буди намъ вкупе с тобою умрети, нежели жити без тебе много. Неверьство же сие не мы приказали есми, но невернии, нехрабрии перси, суседи бо тии индеяномъ и устрашают нас. Нас бо индеяне добре знают». И сие Александръ слышавъ и на персы разгневався и в женьские свиты облече ихъ и убрусы женьские на главы постави все.