Библиотека литературы Древней Руси. Том 8 (XIV - первая половина XVI века)
- Автор: Коллектив авторов
- Серия: Библиотека литературы Древней Руси #8
- Год: 2003
- Язык: русский
- Жанр: Древнерусская литература
Электронная книга - «Библиотека литературы Древней Руси. Том 8 (XIV - первая половина XVI века)». Краткое содержание книги:
Александръ же с вои своими поиде, отока же некоего малаго достиг, высокъ велми. И на него взошедъ и образъ свой во злате на столпе высокомъ постави, и в руцы десной держаше меч и ным показоваше к Македоньским отоком. Оттоле двигся с вои своими, 6 дней прешед, до места некоего приспе. Гора же высока бяше ту, за ту же гору человекъ привязанъ бяше веригами гвоздинными, велми высокъ, 1000 сажен в вышину, 200 сажен ширина. И сего Александръ видевъ, ... подивися, и к сему не смеюще приступити. Плачющу бо человеку тому, за 4 дни глас его слышати. И тако же к горе велицей пришедше, жену велику обретохом веригами привязана, 1000 сажен в долготу и 200 сажен толстоту; змей же великъ от ногу свился, за уста держаше ю, глаголати не дастъ. Тако 8 дний прешедше, езеро много и змей много бысть, яко муки, в нихже грешнии человецы мучитися имут.
И ту Александръ с вои своими станомъ ставъ, плоты повеле сотворити, во оток Макаринский хотя поити, Филона же с собою поим, тамо прееха. Видев же во отоце томъ древа высока зело, красна, овошми украшена, едина зреяху, друзии же цветяху, инии презреваху, плода же ихъ множество на земли лежаху. Птицы же краснии на древехъ различными сладкими песни пояху. Под листвием же древъ тех людие лежаху и источницы сладкими ис корении техъ древъ течаху. Внутрь же вшедъ Александръ, единаго их срете и рече: «Миръ тебе, брате». Он же ко Александру рече: «Всемъ радость буди, Александру, суетнаго света царю». Александръ же к ним глаголати хоте, они же не хотеша, ко Александру рекоша: «Ко старейшим нашим внутрь поиди, они тя вземше, ко старейшинам приведут, Иованту. Он тебе вся о души твоей и о смерти скажетъ, и о животе нашем, и животе вашемъ, и о всех, яже уведати хощетъ». Александру внутрь шествующу, множество людей тых сретаху его и в лице его целовахом, и вси ему хождение, иже о немъ, прорицаху. Се видевъ Александръ подивися, боги же мневъ быти, а не человеки. И тако ему вещающе, ко Иованту царю своему ведяху его.
Иовант же бе под неким древом лежа; вода же красна близу течаше; простер же его и покровъ от листвия древ тых. Иовантъ же Александра видевъ, главою покивав и рече: «Что к намъ пришел еси, неуставнаго суетнаго света царю?» И сего приимъ за руку, близ себе посади. Александръ же близ сяде. Иовантъ же главу его приимъ руками обьят и сию сладко облобызавъ, рече: «Радуйся, всехъ главъ главо, егда бо весь миръ и светъ приимеши, и к тому господарьства своего и отечества не узриши; но егда вся земъская приобрящеши, тогда ада наследиши». И се слышав Александръ оскорбися душею, ко Иованту рече: «Почто сие слово рече ми?» Иовантъ рече к нему: «Велеумну мужю не подобает толковати». Александръ же рече к нему: «Аще велиши, да принесем ти, что потребно, иже в нашей земли». Они же вси рекоша: «Дай же намъ бесмертие». Александръ же рече к нимъ: «Смертен есми самъ, како вамъ безсмертие дамъ?» Александръ Филону повеле хлебъ чистъ принести и вино. Иовантъ же видев, ничтоже не приятъ, но рече: «Не нам есть сия пища, но вамъ; намъ пища от древа сего, питие от воды». И много ему дивных речей исповеда. Александръ подивися, проплакавъ рече: «Воистинну, сии человецы божественное житие живут». Ко Иованту же рече: «Откуду сии зде вселишася?» Он же к нему рече: «Адамовы внуцы есми, якоже и вы. Адамъ бо отсюду отшедъ, мы зде остахомъ, сынове Сифовы есмо мы, сына Адамова, иже ему вместо Авеля дастъ ему». Иовантъ же ко Александру рече: «Почто перские ризы носите и различная брашна ясте?» И много с ним глаголюще о всемъ бяху. Александръ же рече: «Скажите ми, како вы рожаетеся, занеже женьскаго пола не вижю у вас». Иовантъ же рече к нему: «Есть у нас жены, но не зде, во иномъ отоку есть, но егда единова к нимъ приходим, и с ними бывше 30 дний и опять возвращаемся; егда же кому родится отроча, по томъ не сочетается уже к жене. Младенцу же 3 лета минет..., мы к себе возмемъ мужеский полъ, а женский з женами есть». Александръ же к нему рече: «Хотелъ бых отока того видети, аще вамъ годно есть». «Отока доидеши, но ничтоже тамо узриши, зде бо дошел, внутрь не глядай, не будет бо человекъ живъ, толко внутрь поглядает». Александръ же, воставъ, во отокъ он поиде и обрете в немъ изъдъ меден, яко градъ, и около обшедъ, внутрь позрети не смея, Богу единому возможно, человеку же ни единому.