Библиотека литературы Древней Руси. Том 2 (XI-XII века)
- Автор: Коллектив авторов
- Серия: Библиотека литературы Древней Руси #2
- Год: 1999
- Язык: русский
- Жанр: Древнерусская литература
Электронная книга - «Библиотека литературы Древней Руси. Том 2 (XI-XII века)». Краткое содержание книги:
Не до сего же тъкъмо злоба ихъ ста, нъ реша глаголюще, яко цьсарь ся на нь гневаеть, да аще и обрящеть, несть ему живота имети. Да и о томь не хотя похулити своего раба, Богъ милостивыи въложи въ сьрдьце цьсарю, якоже «есть присно въ руце Божии цьсаре сьрдьце»,[233] и посъла книгы къ нему, яко: «Отьче чьстьныи, вельми тебе желаю видети. То добро сътвори, потрудися до насъ, да тя видимъ, дондеже еси на семь свете, и молитву твою приимемъ». Абие же шьдъшю ему тамо, приятъ и съ чьстью цьсарь великою и радостью и, учение его похваль, удьрьжа от ученикъ его попа и дьякона съ книгами. Вьсю же волю его сътвори, елико хоте, и не ослушавъ ни о чьсомьже. Облюбль и одарь вельми, проводи и пакы славьно до своего стола. Тако же и патриархъ.
На вьсехъ же путьхъ въ многы напасти въпадъше от неприязни: по пустынямъ въ разбойникы и по морю въ вълны ветрьны, по рекамъ въ смьрчи незапьны, яко ся съконьчати на немь апостольскому словеси: «Беды от разбоиникъ, беды въ мори, беды въ рекахъ, беды от лъжибратии, въ трудехъ и подвижениихъ, въ забъдении множицею, въ алъкани и жажи множицею»,[234] и прочимъ печальмъ, яже апостолъ поминаеть.
Потомь же отвьргъ вься мълъвы и печаль свою на Бога възложь, преже же от ученикъ своихъ посажь дъва попы[235] скорописьця зело, преложи въ бързе вься книгы, вься испълнь разве Макавеи от грьчьска языка въ словеньскъ шестию месяць,[236] начьнъ от марфа месяца, до дъвоюдесяту и шестию дьнь октября месяца. Оконьчавъ же, достоиную хвалу и славу Богу въздасть, дающему такову благодать и поспехъ. И святое възношение таиное съ клиросъмь своимь възнесъ, сътвори память святаго Димитрия.[237] Пьсалтырь бо бе тъкъмо и Евангелие съ Апостолъмь и избьраныими служьбами цьркъвьныими съ философъмь преложилъ пьрьвее. Тъгда же и Номоканонъ, рекъше закону правило, и отьчьскыя книгы преложи.
Пришьдъшю же на страны дунаискыя королю угорьскому,[238] въсхоте и видети, и, етеромъ глаголющемъ и непьщюющемъ, яко не избудеть его без мукы, иде къ нему. Онъ же, яко достоить владыце, тако и приятъ чьстьно и славьно съ веселиемь. И беседовавъ съ нимь, якоже достояше тацема мужема беседы глаголати, отпусти и, улюбль и облобызавъ, съ дары великыими, рекъ ему: «Помяни мя, чьстьныи отьче, въ святыихъ молитвахъ твоихъ присно».
Такоже вься вины отсекъ по вься страны, и уста многоречьныихъ загради,[239] течение же съвьрьши, веру съблюде,[240] чая правьдьнаго веньца. И понеже тако угожь, Богу възлюбленъ бысть.[241] Приближатися начатъ время покои прияти от страсти и многыихъ трудъ мьзду. Въпросиша же и, рекъше: «Кого чуеши, отьче и учителю чьстьныи, въ ученицехъ своихъ, да бы от учения твоего тебе настольникъ былъ?» Показа же имъ единого от известьныихъ ученикъ своихъ, нарицяемаго Горазда, глаголя: «Сь есть вашея земля свободь мужь, ученъ же добре въ латиньскыя книгы, правоверьнъ. То буди Божия воля и ваша любы, якоже и моя». Събьравъшемъ же ся имъ въ Цветьную неделю, вьсемъ людьмъ, въшьдъ въ цьркъвь и немогыи, казавъ благодати цьсаря и князя и клирикы и люди вься, и рече: «Стрезете мене, дети, до 3-яго дьне». Якоже и бысть. Свитающу 3-му дьни, прочее рече: «Въ руце твои, Господи, душю мою вълагаю».[242] На рукахъ иереискахъ почи въ 6 дьнь месяца априля въ 3 индиктъ, въ 6000 и 300 и 90 и 3 лето отъ твари вьсего мира.
Усужьше же и свои ученици и достоины чьсти сътворивъше, и служьбу цьркъвьную латиньскы, грьчьскы и словеньскы сътребиша и положиша и въ съборьнеи цьркъви. И приложися къ отъцемъ своимъ и патриархомъ и пророкомъ и апостоломъ, учителемъ, мученикомъ. Людии же бе-щисльнъ народъ събьравъся, проважааху съ свещами, плачющеся, добра учителя и пастыря: мужьскъ полъ и женьскъ, малии и велиции, богатии и убозии, свободьнии и раби, въдовиця и сироты, страньнии и тоземьци, недужьнии и съдравии, вьси — бывъшааго вьсячьско вьсемъ, да бы вься приобрелъ. Ты же съвыше, святая и чьстьная главо, молитвами своими призираи на ны, желающая тебе избавляи от вьсякоя напасти, ученикы своя и учение пространяя, а ереси прогоня, да достоино зъвания нашего живъше сьде, станемъ съ тобою, твое стадо, о десную страну Христа Бога нашего, вечьную жизнь приемлюще от него. Тому бо есть слава и чьсть въ векы векомъ. Аминь.
233
... есть присно ... сьрдьце... — Притч. 21, 1.
234
Беды от разбоиникъ ... множицею... — 2 Кор. 11, 26—27.
235
... дъва попы... — При числительном дъва употреблена форма множ. числа; ожидалось бы: попа. Первоначально было «три», обозначенное глаголической буквой «веди». При переписке текста из глаголицы в кириллицу писец заменил глаголическое «веди» на кириллическую букву «веди», а она имеет числовое значение «два». Догадка Р. Мэтьисена, 1967 г.
236
... шестию месяць... — Аналогичная путаница числительных при переписке из глаголицы в кириллицу. Должно быть «восемь». Догадка М. Решетара, 1913 г.
237
... святаго Димитрия. — День памяти св. Димитрия Солунского 26 октября.
238
...королю угорьскому... — Указание на венгерского короля не соответствует историчес-кой действительности. Хотя племена венгров проникали в Моравию с конца IX в., король у них появился лишь в XI в. По мнению А. Брюкнера (1967), речь идет ο франкском короле Карле III. Вероятнее, однако, что королем назван вождь какой-нибудь венгерской племенной группы, которые начали появляться в этих местах с VIII в.
239
...уста многоречьныихъ загради... — Пс. 61, 12.
240
...течение же съвьрьши, веру съблюде... — 2 Тим. 4, 7.
241
...тако угожь, Богу възлюбленъ бысть. — Прем. 4, 10.
242
Въ руце твои, Господи, душю мою вълагаю. — Лк. 23, 46.