Библиотека литературы Древней Руси. Том 10 (XVI век)

И приидохомъ к пречестному монастырю Синайские горы. Игуменъ же синайской з братиею вышьли со кресты за полверсты от монастыря стретоша их и патриарху и вынесли крестъ на блюде серебрянъ. Патриархъ же темъ крестомъ благослови игумена и всю братию. К намъ же пришед игумен и целоваху насъ обнимая и захлипаяся слезами, глаголюще: «Благодаримъ Бога сподобившего насъ видети православного царя посланьники». Потом же начаша насъ братия обнимати и целовати с великою любовию и со слезы испущаху от радости. Не могуще удерьжатися от слезъ. И потом внидоша во церковъ. Мы же яко в рай внидохомъ: церковъ Преображение Господа Бога[145] и Спаса нашего Исуса Христа велми чюдна, вымощена мраморомъ белым да синим; да камение резано надробно, да крашено розными красками, а мощена узоры, что камчатыми.[146] Мы же поклонихомся святымъ образомъ и поидохомъ на правую сторону олтаря. Туто же противъ престола на стены стоятъ мощи святыя мученицы Екатерины.[147] Гробница зделана от мрамору белого, узоры же хороши резаны на гробницы, длина ей яко сажень. Мы же помолився святыя Екатерины и покрыхомъ те мощи покровомъ царя государя и великого князя Ивана Васильевича всеа Русии. А покровъ с нами посланъ, бархатъ на золоте.[148] В той же церкви за олтаремъ приделъ над Неопалимою купиною, где Моисей видел Богородицу со младенцом во огни стоящу, неопалиму.[149] В тотъ приделъ в Неопалимую купину входъ из надворья, а двери, на нихъ резаны 12 празниковъ.[150] А ходятъ люди в ту церковъ в великой чистоте, ризы измывъ или в новых ризах. А пришедъ ко церковным дверемъ сапоги или попучи снимаютъ долобъ; да ноги вымывъ, да босы входятъ или в суконныхъ чюлках.[151] И внидохомъ мы грешьнии помолитися и видехомъ то место покрыто каменем мраморным, камень в полсажени на четыре углы. Над темъ каменемъ престолъ[152] стоит и служьба божестьвенная соверьшаетца. В немъ же вделаны два камени велики, что опалила Неопалимая купина. И те камени целовал патриархъ, а блиско к нимъ не приходилъ, ставъ одале, излегь по земли, какъ бы мочно достать целовать, а мы грешьнии целовали. А над Купиною горятъ 3 каньдила неугасимыхъ. А на правой стороне написано на полотьне Моисеево деяние.[153] И вышед ис того придела прямо в стене заделаны мощи святыхъ отецъ избиенныхъ в Синаи и в Раифе.[154] А в большой церкви 12 столповъ иссечены от дикого камени, а поникадилъ 50.[155] А всехъ церьквей и приделов в Синайскомъ монастыре 25. А монастырь стоитъ промежь дву горъ, а келей в немъ 300, все каменные, и ограда каменная, а на вратех градныхъ две пушьки лежатъ. А братьи 90 братов, потому мало, что имъ великое насилие от безбожьныхъ орапов. А тех араповъ дал имъ благочестивый царь Устиян[156] на монастырь 400 человекъ. А ныне добре ихъ много, а живутъ около монастыря по пустынямъ; и пряходятъ в монастырь по 200 человекъ на всякъ день, и емлютъ все с монастыря оброкъ: муку пшеничную, и соль, и масло, и лукъ. А коли имъ старцы корму не дадутъ, и они старцов камениемъ бьютъ за монастыремъ. Видели есмя великое насилие от техъ арапов старцомъ синайским, како могутъ терьпети от нихъ! И видели есми многихъ старцовъ к Богу подвижьны. Среди монастыря кладенецъ, а под темъ кладенъцомъ древо шипокъ, что Моисей насадил. Ис того кладенца весь монастырь питаетца. А на левой стороне против кладенца стоитъ церковъ Василей Кесарийский,[157] а ныне турки в ней собе учинили мечитъ.