Библиотека литературы Древней Руси. Том 15 (XVII век)

Уреченный же день приде. В полунощи прислал царь к нему того сенаторя, дабы ехал к венчанию. Купецъ же сорежаетца для сочетования законного брака. Слуга же рече: «Господине, возми меня с собою!» Он же сказа ему: «Да како могу тебя взяти с собою? Царь не велел никому о семъ поведати. А тебя взять — он меня злою смертию казнит!» Слуга же рече: «Да ты хотел меня слушатца!» Купецъ же чрез великую мочь[310] взял ево с собою и поехаша до царя к венчанию.

И какъ приехаша на царский дворъ, царь же повеле ихъ вести в церковь и обвенчать свещенику. По венчанию же ихъ посади за стол, потомъ повеле ихъ вести на ложу спать. Слуга же купцевъ кликнуша его к себе: «Господине, поиди ко мне до слова!» Царь же то услыша и рече: «Како еси смел сотворити сие, слуге поведати? Ведаешь, что смертию да умрешь!» Он же рече: «Царю, но не могу сего сотворити, что его ослушатися, понеже под великою клятвою», и выйде к слуге своему. Он же рече: «Господине, аще поидешь спать на ложу с царевною, возми меня с собою!» Он же ему сказа: «Да како магу тебя взяти с собою?» Слуга же рече: «Да ты меня слушатца хотелъ!» Купец же рече: «Да како магу тебе пустити, понеже нас запрутъ двоих? Да како же ей, девичье дело, како ей раздетца при тебе?» Слуга же отвеща: «Ты сего не моги! Токмо повели, хотя и двоих запрутъ, а я уже тамо буду. А коли она станетъ стыдитися, и ты ей скажи: „Чего тебе стыдитися, сей слуга всегда при нас будетъ". И станетъ она с табою играть, и захочетъ спать, ты же не спи и сматри на лице ея. Аще же ана здрогнетъ, ты еще смотри. Ежели же в другой раз вздрогнетъ, то ты соиди с постели и стань на мое место, а я возлягу на одре с нею».

Потом друшка[311] взяша купца и царевну и поведоша в особливую полату припочинуть. И запре токмо двоих. Царевна же по обычаю раздевшися, и сташа в одной сорочке, и огленуласъ ко дверемъ, и видитъ человека стояща. Она же вопроси его: «Господине, аки что за человекъ стоитъ, понеже дело мое девичье? Како он семо[312] зашел?» Купецъ же рече: «Чесо тебе, душа моя, ево стыдится, понеже сей рабъ всегда при нас будетъ служить!» Она же сташа с нимъ играть. По игранию же восхоте спати и рече: «Господине, не мешай, аз хощу спати!» Он же повеле ей спати, а самъ ста на нее гледети. И какъ засне, вздрогнула необычно, онъ же прилежно ста смотрети на нее. Потом во вторый такожде вздрогнула так сильно, что от постели в высоту на аршинъ поднело ея и удари о постель. Купецъ же велми ужасеся и сниде с постели долой, и ста на месте слуги своего. Слуга же взя клещи и возляже на постелю. Потом изо устъ ея бысть пламе огненное и искры по всей полате. Купецъ же, сие видя, велми ужасеся, и паде на землю, и бысть аки мертвъ, уповая, что слуга его уже умертве. Слуга же вста с постели, и взя клещи, ста у кровати, и виде изходяще изо устъ ея змия велика, взя клещами за шею и удави его и, раздробя в мелкие части, спрята. И подня господина своего едва жива и рече: «И возляжи на одре с женою своею!» Он же не хотяше возлещи с нею, но с нуждею ево привлекъ и по обычею сотвори, по закону брака.