Библиотека литературы Древней Руси. Том 1 (XI-XII века)

Се же не дивно есть, яко от волъхвования сбывается чародейством.[308] Якоже бысть во царство Деметьяново, некый волхвъ, именемъ Аполоня Тянинъ,[309] знаемъ бяше, шествуя и творя всюду, в городех и в селех, бесовьская чюдеса творя. От Рима бо пришедъ въ Узантию, умоленъ бысть от живущих ту, створити сия: отгна множьство змий и скоропия изъ града, яко не вьрежатися человекомъ от нихъ, ярость коньскую обуздавъ, егда схожахуся бояре. Тако же и въ Антиохию[310] пришедъ и умоленъ бывъ от них, томимомъ бо антиохомъ от скорпий и от комаровъ, створи скорпий медянъ и погребе и́ в земли, и малъ столпъ мраморянъ постави надъ ним. И повеле трость держати человекомъ, и ходити по городу, звати, тростемъ трясомомъ: «Бес комара граду». Тако изъщезоша изъ града комари и скорпия. И спросиша же и пакы о належащемь на граде трусе, въздохну, списа на дщице сия: «Увы тебе, оканьный городе, яко потрясешися много, одержимъ будеши огнемъ, оплачеть же тя и при березе си Оронтии». О немь же и великый Анастасий Божия города[311] рече: «Аполонию же доже и доныне на нецехъ местех сбываются створенаа, стоящая ова на отвращение четвероногъ, птица, могущи вредити человекы, другыя же на въздержание струямъ речнымъ, нездержаньно текущимъ, но ина некая на тленье и вредъ человекомъ суща на побежение стоять. И не точью бо за живота его така и таковая створиша бесове его ради, но и по смерти его пребывающа у гроба его знаменья творяху во имя его, а на прелещение оканнымъ человекомъ, болма крадомымъ на таковая от дьявола». Кто убо что речеть о творящихъ волшевныхъ делъ? Яко то таковый горазнъ бысть волшебнымъ прелщениемъ, яко воину зазряше ведый Аполоний, яко неистовьствен на ся философьскую хитрость имуща; подобашеть бо ему рещи, якоже и «Азъ словомъ точью творити, ихъже хотяша», а не свершениемъ творити повелеваемая от него. Та же вся ослаблениемъ Божиимъ и творениемь бесовьскымъ бываеть, таковыми вещьми искушатися нашея преславныя веры, аще тверда есть, искрь пребывающи Господеви, ни не влекома врагомъ мечетныхъ ради чюдесъ и сотонинъ делъ, творимомъ от рабъ и слугъ злобие. 2-е и еще и именемъ Господнимъ пророчьствоваша неции, яко Валамъ, и Саулъ, и Каияфа, и бесъ пакы изгнаша, яко Июда и сынове Скевави.[312] Убо и на недостойнии благодетьствует многажды, да етеры свидетельствуеть, ибо Валаамъ чюжь бе обоихъ — житья изящна и веры, но обаче сведельство в немъ благодать инехъ ради смотрения. И Фараонъ таковый бе, но и тому предбудущаа показа. И Навходъносоръ законопреступный, но и сему пакы по мнозехъ сущих посреде же града откры,[313] темь являя, яко мнози, прекостьни имуще умъ, предъ образомъ Христовымъ знаменають иною кознью на прелесть человекомъ, не разумеющимъ добраго, якоже бысть Симонъ[314] волъхвъ, и Менандръ,[315] ини таковыхъ ради, поистине рече: «Не чюдесы прельщати...».