Библиотека литературы Древней Руси. Том 15 (XVII век)

И паки архистратигъ обрати лице свое к земли и сниде на землю низу, аз же воследъ его идях. И абие разступися земля, и внидохом в ню. И доидохом до воды, иже под землею, и вода такоже пред нимъ раступися. Под водою же приидохом в места темная некая зело, в немже мнехъ зрети светъ точию от светлости архангеловы. И видехъ тамо якоже улицы некия и полаты. И в некую во едину от них внидохом, яко в проходную полату, по обема странама имущу окна. На едину же от окон воззре очима своима Михаилъ. И абие разстворися окно, изыде из него огнь горе[214] пламенем, яко гром страшен зело. И глагола ми архангел Михаилъ: „Се есть место, идеже повеле быти тебе праведный Судия до втораго его пришествия". Аз же, сия услышав от него, зело вострепетах, и убояхся, и страхом великим объятъ быв, припадох к ногама его и глагола ему: „Господи мой, великий архистратиже Михаиле! Возможно ли есть грешному покаятися и избыти от сея огненныя муки?" Он же, сия слышав, умолча, и отвратися лицем своим от мене, и возведъ очи свои выспрь. И абие разступися вода и земля горе, раступишися же облацы, и твердь, и воды яже выспрь, и небеса якоже трубою вверхъ. Архангелъ же горе зря. Такоже и аз возревъ и видехъ вверхъ яко трубою же даже до оного света, егоже прежде на небеси видехъ, не слышах же его глаголюща ничтоже. И паки обрати лице свое ко мне и глагола ми: „Милостивъ ти бысть праведный Судия. И се дал тебе сохранити три заповеди сиа: иже престани от нечистоты и не пити вина и табака. Аще сия сохраниши, избавленъ будеши от муки сея". Аз же с радостию великою и с клятвою обещахся сохранити и поклонихся до земли. Он же глагола ми: „Последъствуй ми". И поидохомъ от тоя полаты. И се на другой стране тоя улицы — яко полата же, и окна имущи. Михаил же возревъ на едино от них окно, излияся из него смола со огнемъ. И ничтоже ми архангелъ глагола, проидохом мимо якоже улицею. И разступися вода и земля, и изыдохом по тому же пути вверхъ, имже прежде в землю снидохом, и тако изыдохом на землю.