Библиотека литературы Древней Руси. Том 5 (XIII век)

И мое же худое грешнаго и недостойнаго раба твоего Ефрема моление умиленое, господи Исусе Христе, приими и помилуй, и не отлучи мене лика преподобныхъ. Аще ти много съгрешихъ и тя прогневах паче всехъ, но не вемъ иного Бога разве тебе, иже словомъ всяческая яко въсхоте и быша, ты бо повеле и създашася, всяко дыхание хвалить тебе, Владыку и Господа, сътворшему и създавшему всяческая. Направи же и научи мя, Господи, творити волю твою, и посли благодать в помощь рабу твоему, да всегда, тобою съхраняемъ, избавляюся отъ всехъ нападений вражьихъ. И подаждь всему граду и рабу твоему руку твоея помощи, всегда ми падающу и люте съгрешающу, и не повели взяти, о Владыко, отъ мене душа моея непокаянны отъ тела грешна, но малое покаяние мое приими, яко блуднаго сына, и блудницю, и разбойника, и въскреси мя, и оживи, въ мнозехъ гресехъ суща, молитвами святыя и пречистыя ти Матере девы и всехъ небесныхъ силъ, и всехъ отъ века святыхъ, послужившихъ и много потружьшихся по тобе.

Иже и ныне преподобнаго и блаженнаго Аврамиа успениа память празднуемъ и радующеся ликоствуемъ. Радуйся граде твердъ, набдимъ и хранимъ десницею Бога Вседръжителя! Радуйся пречитая дево, Мати Божия, иже градъ Смоленескъ всегда светло радуется о тебе, хвалится тобою, избавляемъ отъ всякыя беды! Радуйся, граде Смоленескъ, отъ всехъ находящихъ золъ избавляемъ молитвами пресвятыя Богородица и всехъ небесныхъ силъ, и всехъ святыхъ его! Радуйтеся апостоли и пророци, мученици и святители, преподобнии, праведнии и вси святии въ день и в память святаго успениа преподобнаго Авраамиа! Радуйтеся пастуси и наставници Христова стада, патриарси, епископи, архимандрити, игумени, иереи, и дьякони, и весь черноризьческый чинъ, и честьныхъ черноризець, и преставльшихся о Христе, и еже и еще о Бозе и о Господи живущеи въ христоименитой вере, светло радуйтеся ликоствующе въ память успениа преподобнаго Авраамиа! Радуйтеся, о христолюбимии и богохранимии цари и князи, и судьи, богатии и славнии, и нищии о Бозе, уже преставльшиися о Христе и еще о Господе здравьствующе, и всякъ, реку, възрастъ мужескъ и женескъ, уноша и старци, въ честное успение богоноснаго отца Авраамиа! Радуйтеся о Господи множество везде нищии, убозии, слепии же, и хромии, трудоватии и вси просители, не имуть же где главы подъклонити, иже претерпеша гладъ, наготу, зиму, иже претерпеша, рцемъ, многыя сугубыя напасти и скорби и на мори, и на суши, озлоблении и прогнани, и разграблени бес правды отъ велможь и отъ судьй неправедьныхъ, иже си вся приаша и претерпеша с похвалениемъ и благодарениемъ о Христе Исусе Господе нашемъ! И ныне радуйтеся и вы, отшедшии и преставльшиеся отъ сего света, и пакы и еще живущеи съ трьпениемъ о Бозе, веселитеся и радуйтеся, и ликоствуйте въ святое успение богоноснаго отца Авраамиа! Радуйтеся, граде Сионъ и Ерусалиме,[42] и Христова Господа нашего Исуса Христа церкви, ты мати господи всемъ церквамъ,[43] в нем же Господь волное распятие приятъ и претерпе крестъ и смерть, и въскресе за наше спасение и избавление! Радуйтеся святая и честная сущая вся места окрестъ Иерусалима и преподобныхъ пустыня! Се бо суть святыхъ домове, и в нихъ добре поживше, ныне веселятся о Господе. Радуйтеся по всему миру церквы Христовы и домове святыхъ, иже отъ всехъ святитель, и игуменъ, и ерей, и дияконъ, и черноризець, и отъ всехъ благоверныхъ и христолюбивыхъ христианъ, иже молитвы и молениа, и приношениа приносяще на святый жрътвеникъ за оставление греховъ Новаго завета. И да презрить вся съдержай владыка Господь Саваофъ, и прииметь, и посетить яко благъ и всехъ иерей, моляшихся и приношение приносяшихъ ему, и стоящихъ съ страхомъ, и с великымъ вниманиемъ послушающихъ святаго Еуангелиа, и святыхъ всехъ учениа сладкаго, и всехъ любовь и смерение имуще, не въздающе зла и противу злу, тружающеся в долземъ деле день паче отъ дне и злыхъ всехъ отбегающе, а къ добродетели правымъ деломъ и трудомъ понужающеся, радующеся и веселящеся о Господи Боже помощи по милости его, и дасть благостыню свою и благодать, избавление отъ всехъ золъ и бесконечнаго мучение избавит ны. То бо есть благый и великый даръ милости его — входъ въ бесконечное царство Господа Бога нашего Исуса Христа съ всеми избранными его, послушающихъ и творящихъ волю его. Тем же поимъ и молимся славимому отъ всехъ небесныхъ силъ и отъ человекъ, яко въ векы милость его на всехъ, творящихъ волю его, яко тому слава и честь, и дръжава, и покланяние Отцю и Сыну и Святому Духу и ныне, и присно, и в векы векомъ. Аминь.