Библиотека литературы Древней Руси. Том 5 (XIII век)

Пребысть же блаженый в таковемъ подвизании вся дни летъ живота своего, о семь бдя и моляся съ въздыханиемъ, многы же научивъ и наказавъ пребывати въ добремъ труде, въ бдении же и въ молитве, въ терпении же и смирении, въ милостыни же и въ любви. И сице утверди вся съ слезами многами сихъ не забывати николи же и глаголаше: «И мене смиренаго не забывайте въ молитвахъ вашихъ, молящися Владыце и Богу и пресвятей его Матери съ всеми святыми его». И потомъ болезни на блаженаго нашедши, и тако преставися, предавъ блаженую и святую свою душю Господеви, его же желааше и получи, царьство небесное. И пребысть блаженый Авраамий подвизаяся летъ 50, подвизаяся отъ уности до конца живота своего о Христе Исусе Господе нашемъ, ему же слава и дръжава съ Отцемъ и Святымъ Духомъ ныне и присно въ вся бесконечныя веки. Аминь.

А се конець блаженаго и преподобнаго отца нашего Авраамиа и похвала граду сему, и заступление пречистей Богородици приснодеве, и похвала. Азъ же грешный и недостойный Ефремъ и в лености мнозе пребывая, и в последний всехъ, и празденъ, и пустъ бывъ всехъ благыхъ делъ, разве въ праздно имя облекохся, въ аггельскый сий санъ, именемъ черноризець нарицаюся, делы же злыми далече его отстою. А како нарекуся, абы последний нарещися не могу, дела бо злая, яже сдеяхъ, обличають мя и стужають, тем же последний въ житии и блаженому, рцемъ, быхъ ученикъ, иже ни по малу быхъ последуя житию, терпению, смирению, любви и молитве и всехъ его благыхъ нравовъ и обычай, но по вся дни пианъ и веселяся, и глумяся в неподобныхъ делехъ, иже въ правду быхъ празденъ. Онъ умиленый плачася, азъ же веселяся и глумляся; онъ иже на молитву и почитаниа Божественыхъ книгъ, на славословие въ Божию церковь тщася, азъ же на дремание и на сонъ многъ; онъ еже трудитися и бдети, азъ празденъ ходити и в лености мнозе, онъ еже непразденъ ходити, азъ же в лености мнозе; онъ еже не празднословити и не осужати, азъ же осужати и празднословити; онъ же страшный судный день Божий поминая, азъ же трапезы велиа и пиры; онъ паметь смертную и разлучение души отъ телеси, испытание въздушныхъ мытаревъ, азъ же бубны и сопели, и плясаниа; онъ еже подражати житие святыхъ отецъ и подобитися благому житью ихъ, и почитая святая жития ихъ и словеса, азъ же быхъ подражая и любя пустотная и суетная злыхъ обычая; онъ еже смирити себе и уничижити, азъ же веселитися и гордети; онъ нищету любя и безъименьство и вся раздавая требующимъ и сиротамъ, азъ еже събрати и не подати, побеженъ отъ многыя скупости и немилосердия; онъ по смерению ризы любя, азъ же красны и многоценны; онъ рогоже положи и постелю жестоку, азъ же постелю мяхъку и теплу; и не могый терпети студени и мраза и стерпяше, азъ же баню имеа утешену и теплу; онъ о нищихъ тужа, изволя самъ алченъ быти и не вкуся, азъ же отинудь ихъ ненавидя и презря; онъ нагыхъ видевъ плещу и неоденыхъ, мразомъ изъмерзъшихъ, оде, азъ же не вемъ, яко ти тако же отъ тоя же утробы произыдоша, и еще же мнози, утаившися, страньствують Господа ради, яко же рече Павелъ апостолъ, вселеныя учитель: «Их же ни весь миръ имать, яко ходиша въ овчинахъ и в козьяхъ кожахъ, заблужающе и скрывающеся по вселенней, не имуще ни дому, заблуждающе въ верьтепехъ и в пещерахъ земныхъ».[40]