Вертоград многоцветный

Различны книги нам суть Богом предложены, да благонравно жити будем наученны. Первая книга — мир сей, в ней же написася, что-либо от всемощна Господа создася. То же мы писание в то время читаем, егда от твари Творца силу познаваем, И егда, строение всяческих видяще, величаем Строяща, премудрость хваляще, И егда всех доволство нуждных созерцаем, за то благость Дателя славно прославляем. Вторая книга перстом Божим начертася, егда писанный закон Моисием предася Роду Исраилскому, сия поучаше, како богоугодно жити подобаше. А зане же ту токмо един род читал есть и во добродетелех мало успевал есть, Третия всеизрядна всем Книга дадеся, живая, всекрасная с небес принесеся. Та есть Иисус Христос, в Нем же написанно, что яве усты Его миру бе вещанно. Всяких добродетелей учаше свершенства, да будем причастници вечнаго блаженства. Сию книгу полезно людие читают, иже словеса Его делом совершают И образу жития Его подобятся, да снаследници Христу быти сподобятся. Четвертая есть книга Девица Мария, в ней же добродетели писаны всякия, Яже кто житием си тщится подражати, той сию книгу святу умеет читати. В ней и превечно Слово, перстом написанно Отчим, во спасение всем людем есть дано, Его же слова аще кто не почитает, яко зверь безсловесный, неба не познает. Пятая книга — совесть, комуждо свойственна, яже ныне пред людми лежит заключенна, Но на Всестрашном Суде она отключится и всему миру, да чтет, яве предложится. О блажен, иже пишет ныне в ней благая! Горе же тому люто, кто чертает злая! Благ бо за писание благих ублажится, а злый за злая во огнь вечный осудится. О братие, потщимся благая писати, да бы Богом блаженство вечное прияти. Не пишим же лукавых, да бы посрамленным не быти пред всем миром, и в огнь воверженным. Шестая книга — тайна, Сам ту Бог читает, Церковь книгу живота ону нарицает, В памяти же Божией выну содержится. О блажен муж, иже в ней написан явится, Пишут бо ся имена в ней Богом избранных, на вечную жизнь в небо предуготованных. Обаче и инии пишеми бывают, иже в благодати суть, потом же падают. Сии начинателно, а не совершенне написани бывают в книзе божественне. А до смерти живущих в Своей благодати совершенно изволил Бог в ней написати. Мы, братие, потщимся совершенно жити, да можем совершенно написани быти В той книзе божественной, яже изъявится, егда кождо на воздух правый восхитится Во стретение Христа, грядуща судити, в их же сонме даруй нам, Христе Боже, быти.