Библиотека литературы Древней Руси. Том 10 (XVI век)

ЛЕТА 7041-ГО. СКАЗАНИЕ О ВЕЛИКОМЪ КНЯЗЕ ВАСИЛЬЕ ИВАНОВИЧЕ ВСЕА РУСИ, КАКО ЕЗДИЛ ВО СВОЮ ОТЧИНУ НА ВОЛОК НА ЛАМЪСКИЙ[1] НА ОСЕНЬ ТЕШИТИСЯ, И КАК БОЛЕЗНЬ ЕМУ ТАМО СТАЛАСЯ, И МНИШЕСКИЙ ОБРАЗ ПРИЯЛ, И СЫНА СВОЕГО ВЕЛИКОГО КНЯЗЯ ИВАНА ВАСИЛЬЕВИЧА НА ЦАРСТВО БЛАГОСЛОВИЛЪ, И О ПРЕСТАВЛЕНИИ, И О ПОГРЕБЕНИИ ЕГО

Князь велики Василей Иванович всеа Руси начатъ мыслити ехати во свою вотчину на Волок на Ламъский на осень тешится. И прииде к великому князю весть с Поля[2] месяца августа въ 12 день, за три дни до Оспожина дни,[3] что к Рязани идуть безбожьнии татарове кримские, царь Сап-Кирей да Исламъ царевичь[4] со многими людьми. Князь же велики Василей Иванович воскоре посла по братию свою, по князя Юрья Ивановича[5] и по князя Андрея Ивановича,[6] а братия же его приехавше въскоре к нему.

Тогда же князь велики посла воевод своих с Москвы на Коломну, на Берег, на Оку:[7] князя Дмитрея Федоровича Бельского,[8] да князя Василья Васильевича Шюйского, да Михаила Семеновича Воронцова,[9] да Ивана Васильевича Ляцкого;[10] а князя Семена Федоровича Бельского,[11] да князя Ивана Федоровича Овчину-Телепнева,[12] да князя Дмитрея Федоровича Палецкого[13] наперед тое вести князь же великий послал в Мещеру.[14] И тогда князь велики за ними гонца послал, и повеле имъ возвратитися вскоре на Коломну же с людьми; а тогда бысть на Коломне наместникъ и воевода князь Иван Белской Федорович.[15]

И снидошася воеводы многие на Коломну, а с ними люди многие, дворяня великого князя и дети боярские;[16] а безбожьнии татарове приидоша на Рязань месяца августа в 15 день, в пяток, на Оспожинъ день, и посады на Резани пожгоша, и ко граду приступаху, но града не взяша. У Рязани тогда бысть воевода князь Ондрей Дмитреевич Ростовский, и с нимъ дети боярские, рязанцы. А безбожьнии татарове жгуще и в плен ведуще, и волости воююще.