Вертоград многоцветный

Елма плоть смертну Бог Слово прияше, в юдоли плача с людми обиташе. Егда в безсмертну ту же облечеся, в радости место славно вознесеся, Еже с аггелы в небе пребывати, честь же и славу от них приимати. Аще же мира сего удалися, Церковь никако от Него лишися, Выну бо с нею Христос пребывает, яко же глава плоть си управляет. И отшествием Он плоти Своея многия ползы удом Си содея. Во-первых, полза Церкви есть велика, яко на небо возшел всех Владыка. Да веру нашу велику содеет, яже в незрима верити умеет. Блаженни тогда ученици бяху, елма, видяще Христа, вероваху. Не менше тыя леть блаженны звати, иже, не зревше, тщатся веровати. Сам сицевыя Господь ублажил есть, егда сумнива Фому уверил есть. Вторая полза верным сотворися, яко надежда онех возвысися, Еже и телу вознестися тамо, глава онаго вознесеся камо. Третия полза Церкви сотворенна, любовь к небеси ея обращенна. Да сущих тамо потщимся искати, а яже мира, во ничто вменяти. Четвертая есть, яко добре знаем, яко не проста мужа почитаем Славою Бога, но из Бога суща, тожде существо со Отцем имуща. Пятая полза, яко божественный путь нам к небеси, Христом проявленный, Да бы из странства в отчество желати, мир сей презрети, премирных искати. Шестая полза. еже заключенно всем бяше небо, то бысть отверзенно, Да святых души не во ад отходят, но во жилища небесная входят. Седмая полза, яко всем известно, святым устрой Христос место честно В радости вечней, еже тамо жити и во светлости безконечней быти. Осмая полза, яко Христос в небе выну ходатай есть в нашей потребе К Отцу Своему, всегда заступает, язвы Оному Своя предъявляет, Да онех ради изволит простити, что мы дерзнухом пред Ним согрешити. Девятая есть полза сотворенна, яко посла в мир Духа Божественна Христос Спаситель, егда воцарися, и на престоле Отче посадися. Десятая же полза нам бывает, яко всех сердца Христос привлекает По Себе в небо, да к тому желаем и сокровище тамо наше знаем. Царствуй же, Христе, в небе во вся веки, управляй свыше Твоя человеки, Да и мы в небо возможем приити, с Отцем и с Духом Святым Тя хвалити.