Библиотека литературы Древней Руси. Том 5 (XIII век)

ИЗ ЛАВРЕНТЬЕВСКОЙ ЛЕТОПИСИ

В лето 6731. Всеволодъ Гюргевич иде из Новагорода къ отцю своему в Володимерь, новгородци же пояша к собе Ярослава Всеволодича ис Переяславля княжитъ.

Того же лета явишася языци, их же никто же добре ясно не весть, кто суть, и отколе изидоша, и что языкъ ихъ, и которого племени суть, и что вера ихъ. И зовуть я татары, а инии глаголють таумены, а друзии печенези. Ини глаголють, яко се суть, о них же Мефодий, Патомьскый епископъ,[123] сведетельствует, яко си суть ишли ис пустыня Етриевьскы, суще межю встоком и севером. Тако бо Мефодий рече: «Яко къ скончанью временъ явитися тем, яже загна Гедеонъ,[124] и попленять вся землю от встока до Ефранта, и от Тигръ до Понетьскаго моря,[125] кроме Ефиопья». Богъ же единъ весть ихъ, кто суть и отколе изидоша, премудрии мужи ведять я добре, кто книгы разумно умееть. Мы же их не вемы, кто суть, но сде вписахом о них памати ради русскых князий, беды, яже бысть от них.

И мы слышахом, яко многы страны поплениша: Ясы, Обезы, Касогы,[126] и половець безбожных множество избиша, а инехъ загнаша. И тако измроша убиваеми гневом Божьимь и пречистыя его Матере. Много бо зла створиша ти оканнии половци Руской земли. Того ради всемилостивый Богъ хотя погубити и наказати безбожныя сыны Измаиловы, куманы,[127] яко да отмьстять кровь христьяньску; еже и бысть над ними безаконьными. Проидоша бо ти таурмени всю страну Куманьску и придоша близь Руси, иде же зовется валъ Половечьскый. И слышавше я русстии князи Мстиславъ Кыевьскый, и Мстиславъ Торопичскый[128] и Черниговьскый, и прочии князи здумаша ити на ня, мняще яко ти поидут к ним. И послашася в Володимерь к великому князю Юргю, сыну Всеволожю, прося помочи у него. Он же посла к ним благочестиваго князя Василька, сыновца своего, Костянтиновича с ростовци, и не утяну Василко прити к ним в Русь.[129] А князи русстии идоша, и бишася с ними, и побежени быша от них, и мало ихъ избы от смерти; их же остави судъ жити, то ти убежаша, а прочии избьени быша. Мьстиславъ старый добрый князь ту убьенъ бысть, и другый Мстиславъ, и инех князий 7 избьено бысть; а боляръ и прочих вой много множество. Глаголют бо тако, яко кыянъ одинех изгыбло на полку том 10 тысячь.