Незалежнасьць
- Автор: Гилевич Нил Семёнович
- Год: 1991
- Язык: белорусский
- Жанр: Прочая поэзия
Электронная книга - «Незалежнасьць». Краткое содержание книги:
У новую кнігу народнага паэта Беларусі Ніла Гілевіча ўвайшлі творы ярка выражанага грамадскага гучання, напісаныя ім пераважна за апошнія два гады, а таксама некалькі даўніх вершаў, якія захоўваліся ў архіве аўтара і ў перыядычным друку не публікаваліся.
Перейти на страницу:
Я гляджу —
I аж сэрца шчымліва заходзіцца —
Да таго дарагія і любыя мне
Нашы далі лясныя...
Ах, чую, народзіцца
Зараз песьня ў душы —
Весьняй хваляй памкне!
Нават вейкі прымружыў
На хвілю якуюсьці —
Як ад чараў...
I раптам, нібыта праз сон,
Страшны голас нялюдскі скрыгоча:
«Любуешся?
Ну, любуйся, любуйся,
Душа з цябе вон!
Пэўна, думаеш:
Вось яна, спадчына вечная!
I ты вечны насьледнік яе, валадар.
А мяне —
I ў разьлік не бярэш, недарэчына?
Ну, дык ведай:
Не ты тут, а я — гаспадар!
А ў мяне
Ёсць стальныя, масіўныя ськівіцы
I ёсць чэрава-прорва,
Якое не ўняць:
Зьем усё тут, усё!
Не прасі зьлітасьцівіцца —
Схрабашчу ўсе лясы,
Што наўкола стаяць!
I дубровы-гаі,
I бярэзьнікі-ельнікі —
Да апошняга дрэўца —
Суздром сьцераблю!
Зьнішчу ўсё,
Каб нашчадкі твае, пераемнікі,
Мёртвай пусткай убачылі
Гэту зямлю!..»
Жах мяне скалануў.
Азіраюся: «Хто гэта?»
«Га-га-га!» —
Рагатнула нябачная здань.
Навакол — ні душы.
Рэха страшнага рогату
3 Краснай горкі сьвятой
Доўга коціцца ўдаль.
1991, сакавік
Перейти на страницу: