Библиотека литературы Древней Руси. Том 1 (XI-XII века)
- Автор: Коллектив авторов
- Серия: Библиотека литературы Древней Руси #1
- Год: 1997
- Язык: русский
- Жанр: Древнерусская литература
Электронная книга - «Библиотека литературы Древней Руси. Том 1 (XI-XII века)». Краткое содержание книги:
В лето 6454. Ольга съ сыномъ Святославомъ събра вои многы и храбры, и иде на Деревьскую землю. И изыдоша древляне противу. И снемъшемася обема полкома на скупь, суну копьемъ Святославъ на деревляны, и копье летевъ сквози уши коневи и удари в ногы коневи, бе бо велми детескъ.[344] И рече Свенгелдъ и Асмудъ: «Князь уже почалъ, потягнемъ, дружино, по князи». И победиша деревьляны.[345] Деревляне же побегоша и затворишася в городехъ своихъ. Ольга же устремися съ сыномъ своимъ на Искоростень городъ, яко те бяху убиле мужа ея, и ста около города съ сыномъ своимъ, а деревляне затворишася в городе, и боряху крепько из города, ведаху бо, яко сами убиле князя и на что ся предати. И стоя Ольга лето цело, и не можаше взяти города, и умысли сице: посла къ городу, ркущи: «Чего хощете доседети? А вси ваши городи передашася мне, и ялися по дань, и делають нивы своя и землю свою, а вы хощете голодомъ измерети, не имучися по дань». Деревляни же рькоша: «Ради быхомъ ся яли по дань, но хощеши мьшати мужа своего». Рече же имъ Ольга, яко «Азъ уже мьстила есмь мужа своего, когда придоша къ Киеву, и второе, и третьее, еже когда творяхут трызъну мужю моему. А уже не хощю отмщения творити, но хощю дань имати помалу и, смирившися с вами, поиду опять». Ркоша же древляне: «Что хощеши у нас? Ради даемъ и медом и скорою». Она же рече имъ: «Ныне у вас нету меду, ни скоры, но мала у васъ прошю: дайте ми от двора по три голуби и по три воробьи. Азъ бо не хощю тяжькы дани възложити на васъ, якоже мужь мой, но сего у вас прошю мала: изнемогли бо ся есте въ осаде, да вдайте ми се малое». Деревляне же ради быша, събраша же от двора по три голуби и по три воробьи, и послаша къ Ользе с поклоном. Ольга же рече имъ: «Се уже ся есте покориле мне и моему детяти, а идете в городъ, а язъ заутра отступлю от города и поиду в городъ свой». Деревьляне же ради быша, вънидоша в город и поведаша людемъ, и обрадовашася людье в городе. Ольга же раздая воемъ комуждо по голуби, а дьругимъ по воробьеви, и повеле къемуждо голубеви и воробьеви привязати черь и, оберътываючи въ платкы малы, нитькою поверьзаючи къ всемъ голубемъ и воробьемъ. И повеле Ольга, яко смерчеся, пустити голуби и воробии воемъ своимъ. Голуби же и воробьеве полетеша въ гнезда своя, ови в голубникы своя, воробьеве же подъ острехы, и тако загарахуться голубници, и от нихъ клети и одрины. И не бе двора, идеже не горяше, и не бе льзе гасити, вси бо дворе възгорешася. И побегоша людье из города, и повеле Олга воемъ своимъ имати я. И яко взя городъ и пожьже и́, старейшины же города изънима и прочая люди овехъ изби, а другия работе преда мужем своимъ, а прокъ остави ихъ платити дань.
И възложи на ня дань тяжьку, и две части идета Киеву, а третьяя — Вышегороду къ Ользе; бе бо Вышегородъ[346] Ольжинъ город. И иде Олга по Деревьской земли съ сыномъ своимъ и дружиною своею, уставляющи уставы и урокы, и суть становища ея и ловища ея. И приде в городъ свой Киевъ съ сыномъ своимъ Святославом и, пребывши лето едино, в лето 6455 иде Олга Новугороду. И устави по Мьсте погосты и дань, и по Лузе погосты[347] и дань, и оброкы; и ловища ея суть по всей земли, и знамения и места и погосты. И сани ея стоять въ Плесъкове и до сего дни, и по Днепру перевесища и по Десне, и есть село ея Ольжичи и до сего дни. Изрядивши, възвратися къ сыну своему в Киевъ и пребываше с ним въ любви.
В лето 6456. В лето 6457. В лето 6458. В лето 6459. В лето 6460. В лето 6461. В лето 6462.
В лето 6463. Иде Олга въ Грекы и приде к Цесарюграду.[348] И бе тогда цесарь Костянтинъ, сынъ Леонтовъ. И видевъ ю добру сущю лицем и смыслену велми, и удивися цесарь разуму ея, беседова к ней и рекъ ей: «Подобна еси царствовати в городе семъ с нами». Она же, разумевши, и рече къ цесарю: «Азъ погана есмь, да аще мя хощеши крестити, то крести мя самъ, аще ли — то не кресщюся». И крести ю цесарь с патриархом. Просвещена же бывши, радовашеся душею и теломъ. И поучи ю патриархъ о вере и рече ей: «Благословена ты еси в руськых князехъ, яко възлюби светъ, а тму остави. Благословити тя имуть сынове рустии и въ последний родъ внукъ твоихъ». И заповеда ей о церковнемъ уставе, и о молитве, и посте, и о милостыни и о въздержании тела чиста. Она же, поклонивши главу, стояше, аки губа напаяема, внимающи ученью, и, поклонившися патриарху, глаголаше: «Молитвами твоими, владыко, да съхранена буду от сети неприязнены». Бе же имя ей наречено въ кресщении Олена, якоже и древняя цесарица, мати Великого Костянтина. И благослови ю патриархъ и отпусти ю. И по кресщении призва ю цесарь и рече ей: «Хощю тя поняти жене». Она же рече: «Како мя хощеши поняти, а крестивъ мя самъ и нарекъ мя дщерь? А въ крестьянехъ того несть закона, а ты самъ веси». И рече цесарь: «Переклюка мя, Олга». И вдасть ей дары многы, золото и серебро, паволокы, съсуды разноличныя и отпусти ю, нарекъ ю дщерь себе. Она же, хотячи домови, приде къ патриарху, благословения просящи на домъ, и рече ему: «Людье мои погани и сынъ мой, дабы мя Богъ съблюлъ от вьсякого зла». И рече патриархъ: «Чадо верное! Въ Христа крестилася еси и въ Христа облечеся, и Христосъ съхранить тя, якоже съхрани Еноха в первыя роды, потомъ Ноя в ковчезе, Аврама от Авимелеха, Лота от содомлянъ, Моисея от Фараона, Давида от Саула, три отрокы от пещи, Данила от зверий,[349] тако и тебе избавить от неприязни и сетий его». И благослови ю патриархъ, и иде с миром в землю свою и приде къ Киеву.
344
...суну копьемъ ...велми детескъ. — По обычаю бой начинал сам князь. Ребенок Святослав также мечет копье в сторону неприятеля; брошенное детской рукой оно падает в ноги княжеского коня, но ритуал соблюден, и битва начинается.
345
И победиша деревьляны. — Как установил еще А. А. Шахматов, в Начальном своде после этих слов следует: «И възложи на ня дань тяжку ...» (ср. Новг. перв. лет. С. 113). Таким образом, рассказ о четвертой мести Ольги — взятии Искоростеня — появляется только в ПВЛ. Он явно разрушает отмеченную выше символическую «триаду».
346
Вышгород — городок в 15—16 км от Киева, выше по течению Днепра.
347
Погосты — центры, в которых осуществлялся сбор княжеской дани.
348
Иде Олга въ Грекы и приде к Цесарюграду. — В сочинении Константина Багрянородного «О церемониях византийского двора» описан прием Ольги в Константинополе. 9 сентября ее принял император в Магнавре — тронном зале дворца, а затем — императрица Елена. Потом княгиня была приглашена во внутренние покои императрицы, куда явился и Константин с детьми. В честь Ольги был дан обед. Г. Г. Литаврин выдвинул гипотезу, что описанный прием состоялся не в 957 г., как считалось ранее, а в 946 г. Второй раз Ольга, по мнению Литаврина, посетила Константинополь в 954/955 г.; она была принята с большими почестями, так как Византия нуждалась в русской военной помощи. Именно во время этой поездки Ольга крестилась и была наречена «дочерью» императора (Литаврин Г. Г. К вопросу об обстоятельствах, месте и времени крещения княгини Олыи // Древнейшие государства. 1985. М., 1986. С. 49—57). Иную точку зрения высказывает А. В. Назаренко (Когда же княгиня Ольга ездила в Константинополь // ВВ, 1989. Т. 50. С. 63—83). По мнению Д. Оболенского (К вопросу о путешествии русской княгини Ольги в Константинополь в 957 г. // Проблемы изучения культурного наследия. М., 1985. С. 36—47), Ольга крестилась не в Константинополе, а в Киеве после возвращения из Византии.
349
...якоже съхрани Еноха ...Данила от зверий. — Приводятся аналогии из Библии и апокрифов: по апокрифическому преданию праведный Енох был взят живым на небо, Ной спасся от потопа в ковчеге (Быт. Гл. 6—9), ангелы спасли жизнь Лоту (Быт. Гл. 19), герарский царь Авимелех примирился с Авраамом (Быт. Гл. 20), неудачей кончилась попытка царя Саула убить Давида (1 Цар. Гл. 18—19), три отрока, брошенные в горящую печь, остались невредимыми (Дан. Гл. 3), пророка Даниила не тронули голодные львы (Там же. Гл. 6).