Вертоград многоцветный

В естественном законе Иов терпеливый терпения Христова образ бяше живый, Иов бо, всех лишився, даже наг лежаше, а Христос Бог риз кроме на кресте висяше. Иов чад си любезных жалостно лишися, Христос же апостолов Своих отщетися, Егда во страстей время в бегство себе вдаху, от Иудейска рода вдани бывше страху. Иов от главы до стоп злы язвы имел есть, и Христос точне раны всем телом терпел есть. Иов укорения от друг си страдаше, Христос многия хулы от Своих прияше. Иов от жены слова страдаше худая, Христос же от сонмицы слыша люте злая. Иов и душею си име страдания, скорби, страхи, печали и сетования, И Христос во ограде душею страдаше, елма та в Нем прискорбна даже к смерти бяше. Иова томя демон, весь ся изнурил есть, паче противу Христу то он сотворил есть. Иова вси ближнии в болезни лишиша, тожде и Христу в страсти друзи сотвориша. Иов царь Идумейский, ли поне князь бяше, а вся во смирении болезни терпяше. Христос Царь царствующих всесмирен явися, даже на древе крестом от враг умертвися. Иов по страстех паче Богом ублажися, Христос Господь по смерти воскрес, прославися. Благ убо образ Иов, но образованный, сама есмь благость Христос Господь всежеланный. Иова яко раба Его почитаем, Христа яко Господа всех нас прославляем, Желающе, да и нас со Иовом Себе вечны певцы устроит во пресветлом небе.