Tais el Ateno

Ivan Efremov (1908–1972), elstara sovetia sciencisto kaj verkisto, estas klasikulo de du ĝenroj — de la sciencfikcia kaj de la historia beletro.
Lia lasta romano «Tais el Ateno» baziĝas sur la historia epizodo, konata laŭ antikvaj fontoj: la forbruligo de Persepolo, unu el la ĉefurboj de la persa regno, fare de la fama atena hetajro, partopreninta la militiron de Aleksandro de Makedonujo. La romano prilumas unu el la rompaj momentoj de la historio — la transiron disde la naciismo de la V–IV jarcentoj antaŭ nia erao al pli larĝaj rigardoj al la mondo kaj al la homoj, okazintan sub influo de la militoj de Aleksandro la Granda, kaj ankaŭ danke al manifestiĝoj de la tuthomara etiko en instruoj de helenaj filozofoj-humanistoj.
En la romano kiel ruĝa fadeno trairas penso pri etemeco de la belo de la arto kaj de ties inspiranto — virino.