Библиотека литературы Древней Руси. Том 8 (XIV - первая половина XVI века)

В ту же нощъ философ антинский именем Примах виде сонъ: великий храмъ бога Аполона падеся и пиргове вси Антинскаго града обронишася и врата великие Ариева леду падошася; и Александра виде, на лву во градъ Антину въехавша, и по ширинамъ града класие пшенично рустуче, и македоняне зелено и незрело серпы пожинаху. Сия же исповъдавъ и по Александре не веляше гнати. Они же сего яко не чювше во следъ Александра идяху.

Александръ же сихъ ждаше со всеми вои, нарядився при Касталистем лузе, постиже их на Виталском поле. Трубоглашения же и войску уведевше и из луга исходящее и убояшася и сами к собе рекоша: «О коликимъ прелщениемъ прелсти нас сынъ Филипов!» Видеша, яко не мощи убежати, и не хотяще на бой идоша. Александръ же сих преодоле и побегоша. И мнозех убиваху и чрез все Витальское поле гнаху и до Антинского града, и замесившеся обои и вкупе во врата града приидоша македоняне и антиняне. Бяше же видети жалостно, дети же и жены ко всемъ своим на сретение идяху, обои убивахуся; воплю же до небесъ досяжющу и кровем же по странам града текущим, обои замесишася, македоняне и антиняне посреде града сечахуся.

Александръ же посреде ихъ на вологлавом коне ездяше, сечи престати молящеся, и сихъ не могий уставити, ярости наполнишася. Жены же антинстии одираху лица своя, ко Александру вопияху: «Милостивъ буди намъ, царю Александре!» Александръ же, не могий уставити сечи, повеле градъ запалити. Людие же и жены на станы отошли и спасшеся. Тогда великий и дивны богъ их Аполон антинский со всеми своими боги згоре.

Слышав же Александръ рече: «Аще бы се бози были, спаслися бы сами от огня». Жалость и радость смесивъ, рече: «Ныне македоньская оружия антиньскою кровию окровавишася произволениемъ моим, а ихъ недоумениемъ». Дигеон же философ рече: «Мудра накажи — премудрие будет, безумнаго же — возненавидит тя. Дай премудру вину — премудрие будет». Восплакася градъ Антина вся, смятошася вси отоцы вселеньстии. Александръ же се слышав рече: «Главы не разбивъ, мозгу не выняти».